Од штабот на ВМРО-ДПМНЕ се координираше целата акција на 27 април 2017 година, тврди Александар Василевски-Нинџа во своето сведочење денеска во случајот за организаторите на настаните од 27 април.
Пред обвинетите Трајко Вељаноски, поранешен претседател на Собранието, ексминистрите Миле Јанакиески и Спиро Ристовски, и Владимир Атанасовски, бивш директор на УБК, тој ја раскажа својата верзија за тоа што претходело и што се случувало на денот на крвавите настани во законодавниот дом во 2017.
Нинџа со првостепена пресуда е осуден на 8 години затвор во најобемниот судски процес за тие настани. Откако денеска во улога на сведок раскажа што претходело на 27 април, тој зборуваше и за критичниот ден.
рече Нинџа.
„Во 17:30 часот ми се јави Сприо Ристовски и ме повика во штабот. Околу 17:45 часот ми се јави и Сашо Мијалков, кој ме повика и рече ‘дојди во база’. Околу 18:30 часот со Веле Петеушевски се упатив во штабот на ВМРО-ДПМНЕ. Влеговме преку гаражата ‘Тодор Александров’. Веле остана во бифето, а јас се качив на 8. кат. Кога влегов во салата за состаноци, таму беа Митко Чавков, Кирил Божиновски, Спиро Ристовски, Миле Јанакиески и поранешната заменик-министерка за правда Билјана Бришковска. Сите зборуваа на телефон, беше вклучен телевизор на ТВ Нова, се гледаше преносот од пред Собрание. Чавков ме погледна во стил ‘што бараш тука’. Јас реков дека го чекам директорот, мислев Мијалков ќе го најдам таму, но не го видов. Седев до Чавков, носеше тренирки, патики и елече, отспротива беше Кирил Божиновски, двајцата министри беа во фармерки. Како што се движеше толпата пред Собрание така почнаа да координираат. Тоа беше оперативен штаб каде што се издаваа наредби“,
За Чавков рече дека разговарал со двајца началници и им рекол да дејствуваат пасивно. Миле Јанакиески разговарал со Крсто Муковски, а Спиро Ристовски со Богдан Илиевски-Бетмен. Билјана Бришковска, пак, како што рече, била на директна линија со Трајко Вељаноски.
„Беше разочарана дека некој не ја завршил работата внатре, не предизвикал инцидент. Зашто пратениците како Антонио Милошоски, Борис Змејковски, Илија Димовски, Сашо Василевски, Љубен Арнаудов не предизвикале инцидент и не ја завршиле работата… Бришковска му даваше насоки на Трајко Вељаноски да се отворат вратите, знам дека разговараше и со Илија Димовски и Никола Тодоров. А Трајко Вељаноски ја известуваше за тоа што се случува внатре“,
зборуваше Нинџа.
Во штабот дошол и Владимир Атанасовски, со кого излегле заедно. Атанасовски му кажал дека им рекол на Јане Ченто и на другите кои биле во ресторанот „Дион“ да одат кон Собранието, а на Нинџа му дал насока да оди пред Собранието и да известува.
Пред Собранието бил и Горан Грујевски, началник на Петтата управа во УБК, а дошол и Никола Бошкоски од УБК, кој беше опфатен во истрагата за овој предмет, но не беше поднесено обвинение за него бидејќи е во бегство. Пред Собранието, како што тврди Нинџа, му кажале дека шефот на кабинет на тогашниот претседател Ѓорге Иванов, Борис Јосифовски, бил во штабот на ВМРО-ДПМНЕ и кажал дека ќе се прогласи воена состојба.
„Околу 8:15 часот почна да дејствува полицијата. Горан ми рече ова не е на арно. Му се јавија и му рекоа дека под притисок на странски фактор воена состојба нема да има“,
рече Нинџа.
Тој раскажуваше и дека хард-дисковите од Собранието ги извадил Сашо Марковски од УБК (обвинет во претходниот предмет), а потоа биле однесени во тајна база на Управата во близина на Државна болница, каде што со преса биле уништени, а потоа со ножици пресечени на помали парчиња. Оттаму, уништените хард-дисковите Никола Бошкоски ги фрлил во Вардар од мостот кај Мичурин. Со него бил и Нинџа.
„Никола Бошкоски ми кажа дека Сашо Марковски со хируршки ракавици ги одзел дисковите и ми рече ‘гледаш ли како работи УБК, ова ти е дипломска, треба да учиш од нас’“,
сведочеше Нинџа.
Нинџа раскажуваше и што се случувало по 27 април, кога обвинителството издало потерница за 15 луѓе за учество во толпа.
„Деновите по 27 април Никола Бошковски ми рече дојди на 8. кат во штабот ма ВМРО-ДПМНЕ. Тука беа Билјана Бришковска, Миле Јанакиевски, Владимир Атанасовски и тогашниот републички обвинител Марко Зврлевски. Разговараа за обвинението за одредени лица“,
рече Нинџа.
Владимир Атанасовки, сведочеше тој, му кажувал да им пренесе на Никола Митревски-Кољо и Јане Ченто, за кои тогаш имало потерница, да се предадат бидејќи ќе се средело да лежат малку.
„Ми се јави за Јане Ченто за да му кажам да дојде и да се предаде бидејќи го бараа за насилство, за клоца удрена на Зоран Заев. Ми кажаа дека обвинителот Јован Цветановски лично за него се има јавено. Дојде Јане во Скопје и отидоа со адвокат во полициска станица, каде што по разговорот, по насока на Јован Цветановаки, беше пуштен, а не притворен. Сакам да кажам дека Марко Зврлевски, Гордана Гешковска, Јован Цветановски беа палка на тогашниот врв на ВМРО-ДПМНЕ“,
рече Нинџа.
Испрашувањето на Нинџа од страна на обвинителката Вилма Русковска заврши. Сега прашања ќе му поставуваат адвокатите на обвинетите.
Нинџа е последниот сведок предложен од обвинителството.