Дијалог „Жан Моне“: Се враќа на дневен ред темата за промени во собранискиот Деловник

Македонските пратеници се „сретнаа“ со европарламентарците по повеќе од една година од последниот состанок – пред распуштањето на минатиот собраниски состав

Повторното формирање на работна група на Собранието за изменување и дополнување на Деловникот е позитивен чекор кон постигнување консензус меѓу различните политички партии во Собранието, заклучено е на денешната онлајн средба во рамки на дијалогот „Жан Моне“. меѓу македонските пратеници ипратеници на Европскиот парламент.

„Суштинско е сите страни да ги остават политичките разлики настрана за да се консолидира работата на собранискиот Деловник и да се придонесе за понатамошно зајакнување на институцијата и на реформскиот процес воопшто“,

се наведува во соопштението од состанокот.

Што донесе третиот дијалог од процесот „Жан Моне“?

Во дијалогот учествувале членовите на Европскиот парламент, Илхан Кјучук, Андреас Шидер и Марион Валсман, а од макединска страна спикерот Талат Џафери, потпретседателите на парламентот Горан Мисовски и Фадил Зендели, како и координаторите на пратеничките групи на СДСМ, ВМРО-ДПМНЕ, ДУИ, Беса и Алијанса на Албанците/ Алтернатива. На состанокот присуствувале и претседателот на Комисијата за деловнички и мандатно-имунитетни прашања Панчо Минов, како и генералната секретарка на парламентот Цветанка Иванова.

„Собранието ја потврди својата посветеност на спроведувањето на заклучоците од последната средба во рамките на ‘Жан Моне’ дијалогот, која беше одржана во февруари 2020 година. Европскиот парламент и Собранието на Северна Македонија продолжуваат да бидат посветени партнери во овој процес, а сите соговорници ја истакнаа важноста на дијалогот ‘Жан Моне’ во градењето доверба, зајакнувањето на демократската култура и подобрувањето на парламентарните капацитети“,

се посочува во соопштението од средбата, која е прва во овој собраниски состав.

„Жан Моне“ заврши без договор пратеничкиот имунитет да се одзема со 80 гласа

Како што информираат од Собранието, полноправна рунда на дијалогот „Жан Мон“е ќе биде организирана штом здравствените услови дозволат средби во живо.

Од Собранието велат дека европратениците му искажале целосна поддршка на раководството на Собранието во напорите насочени кон развој на култура на парламентарен дијалог и градење консензус и кон продолжување со институционалните реформи, потребни за процесот на интеграција на земјата во ЕУ.

Ковид-19 го одложи „Жан Моне“, ама пратениците продолжуваат да гласаат со физичко присуство