СДСМ се сомнева дека ВМРО-ДПМНЕ подготвува ново сценарио како на 27 април 2017 година. Според пратеникот од СДСМ, Костадин Костадинов, на тоа наведува најавата на Мицкоски за формирање повеќе пратенички групи, како и учеството на опозицијата на протестот за одбрана на осудените за насилствата во Собранието.
„Најавата за формирање повеќе пратенички групи е навестување за нешто слично како на 27 април 2017. Особено по учеството на ВМРО-ДПМНЕ на протестот за одбрана на осудените за насилствата во Собранието на 27 април, стана јасно дека ВМРО-ДПМНЕ не е излезена од режимската матрица што ја воспостави Никола Груевски“,
изјави Костадинов.
На почетокот на претходниот собраниски состав, тогашното раководство на ВМРО-ДПМНЕ, која замина во опозиција, иако имаше најмногу пратеници, формираше 10 пратенички групи, но тој концепт беше прекинат по смената на партиското кормило.
И опозициската Алијанса/Алтернатива смета дека со формирање повеќе пратенички групи од една партија дополнително ќе се блокира работата на парламентот.
„Со тоа дополнително ќе се блокира работата на Собранието. И ние би можеле да формираме две пратенички групи, ама што потоа“,
рече Елми Азири од пратеничката група на Алијанса/Алтернатива.