Тогашниот пратеник, а сега градоначалник на Скопје, зборуваше и за настаните кои му претходеа на упадот во парламентот пред 4 години, па ја обвини ВМРО-ДПМНЕ дека манипулирала со граѓаните, па праша каде се сега Тиранската платформа и мигрантите со кои тогаш се заплашуваше народот
Градоначалникот на Скопје, Петре Шилегов, кој беше пратеник во период кога пред четири години се случи упадот во Собранието, во вечерашното гостување во „Само вистина“ на Канал 5 ТВ, порача дека треба да се направи разлика помеѓу насилство и напад врз уставниот поредок. Затоа, според него оправдано е делото терористичко загрозување на уставниот поредок и безбедноста, за кое се гонеа и сè уште се гонат инволвирани во настаните од „крвавиот четврток“.
„Нивните кривични дела, на осудените, се поврзани со напад врз уставниот поредок. Тоа беше дива орда од 200 до 300 луѓе кои трчаат кон вас со крв во очите. Шекеринска беше удрена по глава со статив од 12 килограми. Насилство како кривично дело е кога имате конфликт на луѓе со напад врз човечкиот интегритет, но кога нападот е со упад во државна институција, во парламент, тоа не само насилство, туку здружување заради напад на уставен поредок.“,
рече Шилегов во „Само вистина“.
Политичарите, според него, треба да ги осудат настаните, а осудените треба да си останат в затвор.
„Ние, се до 27 април, имавме одбивање од ВМРО ДПМНЕ мирно да ја предаде власта на оние кои победија на изборите и имаа мнозинство. Тоа на 27 април беше газење на волјата на гласачите, не знам која логика имаа тие луѓе тогаш. Ние како здраворазумни мораме да го осудиме таквото постапување, а осудените за нападот да останат таму кај што се. Во нашата држава правилата се исти како и во многу држави. Примопредавањето на власта е врв на демократија, но нам во 2017 година тоа не ни се случи. Уште не можам да разберам што беше причината за тоа да се случи“,
изјави Шилегов.
Ослободување на осудените во неделата на протест, пак, бараа демонстрантите, кои добија поддршка и од ВМРО-ДПМНЕ. Во коментар за протестите, Шилегов, тој порача да се злоупотребуваат деца алудирајќи на фотографиите кои се појавија од девојче со транспарент „Слобода за тато“.
„Тоа што се случи во неделата со протестот, нè потсети на немилиот настан кога ние пратениците бевме предмет на директен напад, имаше присебни пратеници и од ВМРО ДПМНЕ кои застанаа во наша одбрана. Но, верувам и тие не се чувствуваа пријатно од она што го гледаа. Кога видовме дека толпата влезе во парламентот беше јасно дека ситуацијата е надвор од контрола или е под контрола од некого кој планирал таква контрола. Како ми било мене, ќерка ми имаше 14 години тогаш, како и било неа? Но, да не ги злоупотребуваме децата. И јас би го гушнал тоа девојче што жали за таткото што и е во затвор“,
рече Шилегов.
„Каде се Тиранската платформа и мигрантите?“
Тогашниот пратеник, а сега градоначалник на Скопје, зборуваше и за настаните кои му претходеа на упадот во парламентот пред 4 години, па ја обвини ВМРО-ДПМНЕ дека манипулирала со граѓаните.
„Господин што е сега во Будимпешта повика да не седат луѓето во папучи дома, туку да излезат надвор и потоа се случија немирите на 27 април. Каде им се сега сите работи со кои манипулираа на протестите во 2017-та? Каде се сега мигрантите, каде е Тиранската платформа, што тогаш ги користевте за да играте со емоциите на граѓаните, после четири месеци се виде дека нема да можеме да формираме влада, иако имаме мнозинство во парламентот“,
рече Шилегов.