Папата Франциск денеска ја заврши својата историска посета на Ирак и се враќа во Рим, информира „Ватикан њуз“.
Поглаварот на Римокатоличката црква вчера попладне, под силно обезбедување, одржа миса пред илјадници верници во градот на Ербил, во автономната курдистанска зона во Ирак.
Франциск (84) на мисата беше превезен со неговото специјално блиндирано возило, „папамобил“, додека верниците беа на тревникот и на трибините на стадионот, на доволна оддалеченост поради епидемиолошките мерки. По патувањата со авион, хеликоптер и блиндиран автомобил, папата вчера беше најблиску до верниците.
За време на неговата тридневна посета на Ирак, папата Франциск во древниот град Наџаф разговараше со еден од највисоките шиитски духовни лидери во Ирак, ајатолахот Али ал-Систани.
Пред посетата, папата рече дека оди на аџилак на мирот, по повеќе години војна и тероризам.
Тој инсистираше да го реализира ова патување и покрај зголемувањето на бројот на случаи со коронавирус во Ирак и особено поради загриженоста за неговата безбедност.