Министерот за правда, Бојан Маричиќ, денеска рече дека најверојатно, тој е првиот член во Владата кој дознал дека се подготвува бегство на обвинетиот Сашо Мијалков и за тоа разбрал во петокот, на неформална средба со јавен обвинител
Шефицата на Обвинителството за гонење на организиран криминал, Вилма Русковска, е обвинителот со кој се сретнал министерот за правда, Бојан Маричиќ во петокот кога беа и завршните зборови за случајот „Таргет-Тврдина“ каде обвинет беше и Сашо Мијалков.
За ова, потврда добиле од порталот А1он, токму од министерот за правда, Бојан Маричиќ. Тој рекол дека имале неформална средба со Русковска, која негираше дека уште во петокот информирала член на Владата за индициите за бегството на Мијалков.
Маричиќ за порталот вели дека на средбата со Русковска разговарале за проблемите во Обвинителството од повеќе апспекти, а информацијата за можно бегство на Мијалков му била кажана како гласина која обвинителката ја слушнала, но не посочила извор.
„Тоа беше неформална средба и се разговараше за повеќе теми поврзани со работатат на Обвинителството, имплементација на Законот за јавно обвинителство…Јас немав ниту информација дека тој ден имало завршни зборови за случајот ‘Таргет-Тврдина’. Не знаев кој е изворот, но посочив да се проверат информации и доколку се точни да се постапи“,
вели Маричиќ.
Според ова, Русковска уште во петокот добила информација дека Мијалков подготвува бегство. Но, според она што е познато, таа во саботата барала од МВР да се проверат овие информации, а во неделата Обвинителството побарало притвор од Кривичниот суд.
Русковска негираше дека во петокот известила член на Владата за можното бегство на Мијалков.
„Дури кога се видов со колегите што постапуваат по предметот, ми кажаа дека завршните зборови за овој предмет се целсоно завршени. Јас ни тоа не знаев, мислев дека во понеделник, односно вчера, ќе завршат. Така што , немав зошто да се јавувам ниту на министерот за внатрешни работи, ниту на било кој член на Владата“,
изјави Русковска на новинарско прашање во вторникот откако Мијалков сам се појави во Обвинителството.
Русковска рече дека дури во саботата откако добила информација од нејзин извор за можно бегство на Мијалков го информирала министерот Оливер Спасовски.
Министерот за правда, Бојан Маричиќ, пак, денеска рече дека најверојатно, тој е првиот член во Владата кој дознал дека се подготвува бегство на обвинетиот Сашо Мијалков. За тоа, како што рече, разбрал во петокот вечерта, на неформална средба со јавен обвинител, кога му било посочено оти постојат шпекулации, дури и како чаршиски муабет, дека е можно такво нешто.
„Како човек што води сериозна институција, му укажав на обвинителот дека треба да се проверат гласините, бидејќи не ми беше соопштено кој е изворот, односно тоа беше зачувано како податок што не ми е достапен ниту, пак, ми го кажа обвинителот. Замолив да се проверат тие наводи и доколку тоа има основа и се потврдат тие гласини, обвинителството да ги преземе потребните мерки“,
изјави денеска Маричиќ.