Сите градски улици и булевари во текот на деноноќието беа чисти и проодни и никаде не е забележан застој на сообраќајот, а јавниот превоз се одвива без проблеми и нема одложени градски линии на ЈСП Скопје, велат од Град Скопје по состанокот на кризниот штаб.
„Екипите на зимската служба на Град Скопје беа на терен уште од почетокот на вчерашниот ден и во текот на ноќта, при што досега се фрлени над 1000 тони сол на градските булевари и улици. На состанокот од Кризниот штаб на Град Скопје со кој раководи градоначалникот Шилегов беше потврдено дека Скопјани ќе ја дочекаат работната недела со целосно функционални улици и тротоари“,
велат од Град Скопје.
Од таму додаваат дека исчистени се и локалните патишта до Средно Водно, Долна Матка, Усје, Сопиште, Пинтија, Љубанци, Љуботен и Бањани.
„Потсетуваме дека во надлежност на Град Скопје се булеварите и поголемите градски улици, а преостанатите улици се во надлежност на општините и тие се задолжени за нивно чистење и одржување“,
се вели во соопштението.
Од Град Скопје посочија дека определени политички структури и бивши високи градски функционири свесно креирале лажни вести за наводно блокирани градски улици, покажувајќи фотографии од минатото кое не е реалност денес, а како што велат, беа карактеристични за времето на нивното управување со градот. Од таму ги повикаа граѓаните да не подлегнуваат на, како што велат, лажните вести.
Претходно, од ВМРО-ДПМНЕ обвинија дека Градот Скопје е блокиран и непроооден при првиот снег.
„Градот Скопје троши милиони евра за чистење на снег, кој како што можете да видите воопшто не е исчистен. Снегот можеби ќе ја сокрие нечистотијата на градот, но ќе ја извади на површина неспособноста на Шилегов. Ништо подобра не е ни состојбата со државните, регионалните и магистралните патишта низ државата. За ваквото неодговорно однесување, за ова неработење и за ова недолично однесување граѓаните ќе ви возвратат културно на локалните избори оваа година“,
порачаа од ВМРО-ДПМНЕ.