Министерството за внатрешни работи ги вештачи мобилните телефони на четворицата осомничени во случајот „Јавна соба“, јави ТВ 24.
Секторот за компјутерски криминал во МВР ја истражува содржината и барааат докази какви фотографии, видеа поседуваат дали меѓу нив има порнографски материјали за малолетнички.
Полицискиот портпарол, Тони Ангеловски во гостувањето во емисијата „360 Степени“ во петокот информираше дека дел од членовите во оваа група „мигрирале“ во други групи каде потанаму споделуваат фотографии и клипови, а во една од нив членуваат и државјани од Србија.
„Како што веќе знаете ‘Јавна соба’ е затворена, но отворена е друга група и работиме на детектирање на тие членови. Се работи за нова група во која е направен трансфер на членови од претходната, но имаме група и со членови од Србија. Во моментов работиме на детектирање на сите овие инволвирани со цел санкционирање“,
порача Ангеловски.
Коментирајќи ја оваа група, Ангеловски денеска во изјава за „Телма“ рече дека МВР веќе контактирало со српските колеги и дека во оваа група најмногу се споделуваат фотографии и видео клипови од жртви од Србија.
Тој посочи дека од „Телеграм“ е побарано да ја затвори и оваа група.
Инаку, невладините организации за родова еднаквост најавија протестен марш во среда и бараат сексуалното вознемирување да стане кривично дело.
Министерот за правда Бојан Маричиќ пак, најави дека во Кривичниот законик ќе влезе ново дело- демнење.