Ставот на Владата во врска со „патоказот“, кој го бара Бугарија за спроведување на Договорот, е дека тој би требало да биде надвор од преговарачката рамка.
Портпаролот на Владата Душко Арсовски изјави дека во моментов со источниот сосед се разговара за Коридорот 8, забрзување на работата на историската комисија и други дилеми што се изнесуваат од бугарска страна.
„Се разговара за сите загрижености и дилеми што Бугарија ги изнесува во јавност за начинот и динамиката на спроведувањето на Договорот, како да се забрза изградбата на Коридорот 8. Се разговара за тоа како да се запре говорот на омраза, на кој начин да се забрза работата на историската комисија. Сѐ ова е насока на воспоставување доверба во процесот, Договорот е сериозен документ и нема потреба од нов договор и анекс. Сè што има потреба е да се дообјасни и детализира во некој придружен документ. Во таа насока е и патоказот. Тоа е една идеја која е во насока на зајакнување на довербата и функционалноста на Договорот. Владата смета дека тој план треба да се однесува на динамиката на спроведување на билатералниот договор надвор од преговарачката рамка“,
изјави Арсовски.
На прашање дали Владата ќе реагира на изјавите на Борисов за германскиот весник „Франкфуртер алгемејне цајтунг“ дека Македонците се преобразени Бугари и дека не постои македонско малцинство, владиниот портпарол изјави дека Владата нема да се меша во внатрешните работи на друга земја бидејќи тоа е уставна обврска, но и обврска презема со Договорот за добрососедство.
- Борисов: Бугарските комунисти контролирани од сталинистичка Москва ги принудуваа Бугарите во Македонија да се нарекуваат Македонци
- Авторот на интервјуто со Борисов коментира: Бугарија прави сѐ за да го загуби пријателството со Македонците
Сепак, тој уште еднаш го повтори ставот дека во ЕУ ќе влеземе како Македонци кои зборуваат македонски јазик.
„Македонскиот народ и јазик се неспорен факт, имаме неприкосновено право на самоопределување, никој не го спори тоа и ќе станеме дел од ЕУ како Македонци кои зборуваат македонски јазик“,
рече Арсовски.
Инаку, во врска со „патоказот“, денеска реагираше и Институтот за европска политика од каде што, исто така, порачаа дека тоа не треба да биде дел од преговарачката рамка и би значело прифаќање на бугарските барање, а сето тоа ќе го затруе процесот на преговори.