Основното јавно обвинителство (ОЈО) – Скопје побара вкупни казни од 7 500 евра во случајот „Боемска“, каде што лидерот на ВМРО-ДПМНЕ Христијан Мицкоски седеше во затворениот дел од локалот, спротивно на здравствените протоколи.
Од Обвинителството велат дека ги разгледале доказите и поднеле предлог да им се изречат казни на газдарицата, еден вработен и на локалот како правно лице бидејќи се осомничени дека сториле кривично дело непостапување според здравствените прописи за време на епидемија. Предлогот е секој од нив да плати по 2 500 евра (вкупно 7 500 евра).
Обвинетите, на 3 јуни, во периодот од 13:30 до 18:00 часот, во угостителски објект на улицата „Боемска“, не постапиле согласно прописите и наредбите за спречување на ширењето на заразната болест ковид-19.
„Првообвинетата, како сопственик и управител-менаџер на обвинетото правно лице, не го организирала процесот на работа на угостителскиот објект согласно Протоколот за отворање и работа на угостителски објекти за исхрана. Второобвинетиот – вработен во правното лице, во наведениот период го отворил внатрешниот, затворен дел на угостителскиот објект за работа, каде што со храна и пијалаци биле послужувани пет гости“,
соопштија од ОЈО Скопје.
Во соопштението на ОЈО, гостите кои биле во затворениот дел, меѓу кои и Мицкоски, се споменуваат само во наведената реченица со која се објаснуваат дејствијата на келнерот.
Лидерот на ВМРО-ДПМНЕ беше „уловен“ во локалот на 3 јуни, а во јавноста излезе со објаснување дека во тој момент не му биле познати протоколите.