На средбата, претставниците на ЗНМ и градоначалничката Арсовска дискутираа за одржување на редовни брифинзи со новинарите како начин за унапредувањето на транспарентноста на Град Скопје, при што во интерес на двете страни и јавноста е неделно да се брифира за настани поврзани со работата на градот
Здружението на новинарите на Македонија (ЗНМ) денеска соопшти дека одржало средба со градоначалничката на Скопје, Данела Арсовска на која било разговарано за унапредување на транспаретноста и комуникацијата на Град Скопје со новинарите.
Средбата, како што информираат од ЗНМ, била на нивно барање, а на неа присуствувале претседателот на Здружението, Младен Чадиковски и претставници на ЗНМ.
Како што се посочува, претставници на ЗНМ своите барања ги изложиле во три точки:
- унапредување на транспаретноста
- редовни брифинзи, еднаш неделно
- отвореност за новинарски прашања
„На средбата, претставниците на ЗНМ и градоначалничката Арсовска дискутираа за одржување на редовни брифинзи со новинарите како начин за унапредувањето на транспарентноста на Град Скопје, при што во интерес на двете страни и јавноста е неделно да се брифира за настани поврзани со работата на градот“,
се наведува во соопштението од ЗНМ.
Оттаму потенцираат дека е многу важно администрацијата на Градот Скопје да биде отворена и транспаретна кон новинарите, бидејќи ти играат клучна улога во информирањето на јавноста.
„Професионалните новинари помагаат на избраните функционери да бидат транспарентни пред граѓаните преку известување за нивните активности, политики и резултати, со што се гради доверба и кредибилитет. Дополнително, со слободниот проток на информации, се овозможува придвижување кон функционална демократија“,
истакнуваат од Здружението на новинарите на Македонија.
Изминатиот период новинарите се соочуваа со тешкотии и наидуваа на затвореност од администрацијата на Градот во своите обиди да остварат комуникација и да добијат одговори на прашањата од јавен интерес, и покрај големиот број настани и теми во кои еден од главните актери беа и сè уште се Градот Скопје и градоначалничката, Данела Арсовска.
Засега нема информација како градоначалничката одговорила и дали ги прифатила барањата на ЗНМ.