Јас можам да бидам амалгам што ќе ги приближи и нема да ги оддалечува ставовите на политичките партии и да бидам шанса за перспектива на граѓаните, порача денеска од Гостивар, кандидатот за премиер од ДУИ, Насер Зибери
„Целта на мојата кандидатура за претседател на владата е да се испрати порака дека Македонија созреа за да создава рамноправни услови за натпревар било тоа на политички, економски, социјален и секаков план. При тоа етничката припадност да не биде клучниот или единствениот критериум со кој некому ќе му се дава шанса за да оди напред. Доколку се сплотиме околу постулатите за заедништво, рамноправност и за европските вредности, ќе создаме тло врз кое ќе се гради заедничката перспектива. Сакам да се наметнам како кандидат кој нуди подобра перспектива, подобра алтернатива и просперитет за сите. Верувам во себе, верувам во субјектот кој ме поддржува во ваквите ставови, дека можам да бидам еден амалгам кој ќе ги приближи, а не оддалечи ставовите помеѓу различните политички партии и да бидам шанса за перспектива на граѓаните,“,
рече Зибери.
Доколку стане претседател на идната Влада, вели дека ќе стимулира економска еднаквост кај граѓаните.
„Секаде кај ќе има сопственик Албанец кој ќе поттикне вработување на другите заедници и обратно, каде сопствениците се Македонци или од другите заедници, ќе стимулирам вработените да бидат од другите заедници“,
рече Зибери.