Со 15 мандати, ДУИ станува уште помоќна за почеток на преговори со македонските партии, оценува кандидатот на интегративците за премиер
Лидерот на ДУИ Али Ахмети веќе се консултира со другите партии од албанскиот камп за поддршка на концептот за прв Албанец премиер во земјава, објави вечерва кандидатот на интегративците за оваа позиција, Насер Зибери.
Тој напиша на фејсбук дека е исклучително задоволен и благодарен за поддршката за албанската кауза и за ДУИ, особено за поддршката што самиот ја добил како прв албански кандидат за премиер.
„Со 15 мандати, ДУИ станува уште помоќна за почеток на преговори со македонските партии. Како што кажавме, оваа идеја е поголема од ДУИ и од која било друга партија. Затоа сакаме да ги обединиме и вклучиме сите албански партии, особено сите граѓани во нашата национална кауза. Али Амети и Демократската унија за интеграција веќе контактираа со другите албански партии за сериозни разговори за поддршка на идејата за албанскиот премиер кој ќе работи за сите граѓани и државата воопшто. Причината поради која ни верувавте и гласавте без партиска боја, оставајќи ги партиите настрана, ни дава храброст и надеж за исполнување на обврската“,
напиша Зибери.
Претходно, Ахмети објави дека, ден по изборите, имал телефонски разговори со претседателот на ДПА Мендух Тачи и со претседателот на Беса Билал Касами, а дека ќе оствари разговори и со претседателите на другите албански партии – Африм Гаши, Зијадин Села и Весел Мемеди.
„Заеднички ќе го процениме резултатот од изборите и ќе размениме мислења“,
напиша Ахмети на фејсбук.
Партиите од т.н. албански камп, според неофицијалните резултати што ги објави ДИК, освоиле вкупно 28 пратенички места, без да се сметаат уште четири мандатишто ги доби Беса во рамки на коалицијата „Можеме“.
Поврзани вести: Тачи за Зибери: Тој е терорист од 1997 година
Села: Зошто ДУИ лани не поддржа Албанец за претседател, а сега бара Албанец за премиер?
Касами: ДУИ го позајми кандидатот за премиер од ПДП, затоа што за 18 години не изгради свој кадар