Имплементирање на консензуално законодавство при одлучувањето и заедничка одговорност, еднаква дистрибуција на јавните инвестиции, задолжителни часови по албански јазик во секое училиште, нула данок на добивка за три години за секој вработен за првпат под 35-годишна возраст, донесување закон со кој се забрануваат казината и игрите на среќа во радиус од еден километар од училиштата, црквите и џамиите, се дел од приоритетите на владината програма на ДУИ, која на отворено пред Владата ги претстави кандидатот за прв премиер Албанец, Насер Зибери.
„Ако сакаме подобар живот за себе во оваа земја, подобра шанса за идните генерации – треба да го промениме начинот на кој се прави политиката овде, треба да ја уништиме биполарноста на двете најголеми македонски партии. Во оваа студена политичка војна, во оваа постојана војна меѓу тесните групи од интерес, никој не победи. Многумина извикуваа победа – но никој не преовлада. Сепак, едно е сигурно: Ние, граѓаните, и Македонците и Албанците изгубивме. Ако не го запреме ова, за жал не само што ќе се изгубат битките од минатото, туку ќе се изгубат и битките за иднината“,
рече Зибери.
Тој истакна дека во неговите ветувања до граѓаните нема генерички фрази, нема политички пароли, без замоци од песок во воздухот, туку има конкретни, искрени и достижни мерки што владата, како што рече, мора да ги преземе што е можно поскоро во областа на економското закрепнување, заштитата на работните места, образованието, развојот на инфраструктурата, правдата и еднаквоста.
Во првата заложба во програмата на партијата има пет конкретни иницијативи:
1. Донесување и имплементирање на консензуално законодавство при одлучувањето и заедничка одговорност. Ова значи дека 10-те стратешки државни институции ќе управуваат заеднички од еден Македонец и еден Албанец, со заеднички права за потпишување;
2. Еднаква дистрибуција на јавните инвестиции. Ова значи дека главните економски одлуки (буџет, инвестиции, даноци) од страна на владата не можат да бидат донесени без поддршка од мнозинството членови на албанскиот кабинет;
3. Задолжителни часови по албански јазик во секое училиште, почнувајќи од 5-то одделение;
4. 13 август, денот на потпишувањето на Охридскиот договор, да се прогласи за национален ден;
5. Постигнување консензус за химната на нашата земја, да се рефлектира оваа разновидност – затоа што овој симбол не треба да биде симбол на исклучивост и нееднаквост, туку на сеопфатност и еднаквост.
Втора заложба опфаќа државата да помогне и да обезбеди субвенции за сите оние кои сакаат да работат и да создадат работни места – нула данок на добивка за три години за секој вработен за прв пат под 35-годишна возраст и нула даноци за компании за три години за секое самовработено лице под 35-годишна возраст и субвенционирање 50 отсто од социјалните придонеси за секое ново вработување.
Тој посочи и дека е потребен закон со кој се забрануваат казината и игрите на среќа на далечина од еден километар од училиштата, црквите и џамиите и минимална плата од 600 евра за секоја медицинска сестра, наставник и учител.
„Обврска за создавање општество за нашите деца, каде можат да живеат во мир и просперитет, каде ќе можат да ги остварат своите соништа, каде што имаат еднакви можности. Обврска да се изгради место каде што нашите деца нема да имаат потреба да емигрираат, затоа што ќе имаат исти или дури и подобри можности овде, каде се родени и каде имаат дом. Обврска за промена на политиката во оваа земја. Да се стави крај на дуополот на моќта што ја задржа нашата земја заглавена во политички војни и економска регресија“,
рече Зибери објаснувајќи зошто ја прифатил кандидатурата за прв премиер Албанец.