Полицијата заплени секири, шрафцигери, маски, чекан и друг алат и празни шишиња „Џек Даниелс“, а запалено било и едно возило
Движењето во Франција познато како „Жолтите елеци“ кое се бори за економска еднаквост и социјална правда, денеска повторно излезе на улиците на Париз и на неколку поголеми француски градови, при што во обновените протести, кои беа во мирување поради пандемијата, уапсени се 154 лица, од кои 54 завршија во притвор, соопшти полицијата.
Полицијата мобилизира околу 3000 нејзини припадници од кои 160 на мотори за да го спроведуваат редот и мирот за време на демонстрациите.
Денешната поворка во Париз тргна од Плас де ла Бурс, продолжи кон авенијата Де Ваграм кон Триумфалната капија. Полицијата им го блокира патот и употреби солзавец, по што избија судири, во кои демонстрантите со различни предмети фрлаа кон полицијата.
Од фотографиите објавени на социјалните мрежи, полицијата прикажа дека запленила секири, шрафцигери, маски, чекан и друг алат и празни шишиња „Џек Даниелс“.
Полицијата не им дозволи на демонстрантите да се распоредат на Елисејските полиња, откако за време на претходните протести цел им беше Ајфеловата кула.
Локалната полиција ги повика демонстантите да не кршат и да почитуваат физичко растијание поради состојбата со коронавирусот во Франција, каде стапката на новозаразени секојдневно расте. Сепак, било запалено едно возило.
„Жолтите елеци“ се појавија пред речиси две години, на 17 ноември 2018 година, а нивните демонстрации прераснаа во насилни. Последен пат пред денепниот протест, тие се собраа на 14 март, три дена пред да биде прогласен карантин во Франција поради пандемијата.