Претходно, 80 работници од „Влеча на возови“ останаа без работа, откако Министерството за финансии не им ги продолжи договорите за работниот ангажман
Синдикалните организации при „Железници транспорт“ побараа веднаш по формирањето на новата влада да се реши проблемот со 80-те работници на кои неодамна не им беше продолжен договорот за работа од страна на Министерството за финансии.
Тие побараа Министерството за финансии да даде позитивен одговор на барањето за вработување на овие 80 лица.
Оттаму побараа и средба со новиот премиер и со министерот за транспорт и врски со цел продолжување на отпочнатите разговори за компанијата.
„Доколку на овие наши барања не биде навремено и во целост позитивно одговорено, ние како синдикати ќе ги преземеме сите мерки што ни стојат на располагање со цел да ги заштитиме нашите колеги и нашата компанија“,
се вели во соопштението.
Претходно, во декември синдикатите реагираа оти на 80 вработени од „Железници – транспорт“ не им е дадена согласност за продолжување на работниот ангажман од страна на Министерството за финансии со што компанијата останува без извршен персонал кој е неопходен за безбедно и непречено одвивање на железничкиот сообраќај.