Брзината на преговорите меѓу земјава и ЕУ зависи од тоа колку брзо ќе ги исполнуваме потребните услови и реформи
Евроамбасадорот Самуел Жбогар во интервју за МИА вели дека одлуката на ЕУ не е само уште една одлука, туку ова е одлука за почеток на преговорите за пристапување.
Европската комисија ќе преговара со нас во името на сите земји-членки на ЕУ, а евроамбасадорот очекува до јуни да биде подготвена предлог преговарачката рамка во која ќе биде вклучена новата методологија.
„Потоа земјите членки треба да го разгледаат и усвојат документот. Откако тоа ќе биде направено ќе се закаже првата меѓувладина седница, која го означува почетокот на процесот на преговарање. Но да повторам уште еднаш, земјите членки донесоа одлука да отворање на преговори. Нема враќање назад, тоа значи дека сега сте во возот за преговарање и тој ја напушти станицата“,
нагласува Жбогар.
Брзината на преговорите, според Жбогар, зависи од тоа колку брзо земјата ќе ги исполнува потребните услови и реформи, за што е потребна соработка од сите политички чинители.
„Мојот совет е да не се гледа на преговорите како на исполнување задачи што треба да ве однесат во ЕУ. Процесот на преговарање е инструмент што треба да ја донесе ЕУ во вашата земја, да донесе вистинска промена на општеството и земјата и со тоа да ги исполни потребите на граѓаните. Патот (преговорите) е подеднакво важен како и крајната дестинација (членството)“,
оценува Жбогар.
За тоа како да се справиме со одливот на млади од земјата, за потенцијалниот камен на сопнување во реформскиот процес, но и справувањето со заедничкиот предизвик на пандемијата на Ковид-19, што е вистински тест за „солидарноста“ на Европа ќе читате во целосното интервју со Жбогар што ќе биде објавено утре.