Земјотресот бил почувствуван во поширокиот регион, односно во северозападниот дел на Пелопонез, како и на островите Лефкада и Закинтос, а засега нема информации за повредени или материјална штета
Земјотрес со јачина од 5 степени според Рихтеровата скала е регистриран попладнево во јужна Грција, соопшти Европскиот медитерански сеизмолошки центар (ЕМСЦ).
Земјотресот се случил во 16:54 часот по локално време.
Епицентарот на земјотресот бил на 66 километри југозападно од градот Патра на полуостровот Пелопонез и 16 километри југозападно од градот Вартоломио на длабочина од 12 километри.
Земјотресот бил почувствуван во поширокиот регион, односно во северозападниот дел на Пелопонез, како и на островите Лефкада и Закинтос, а засега нема информации за повредени или материјална штета.
По земјотресот, нема издадено предупредување за цунами.
Изминатите денови во Грција се регистрираат земјотреси во областите околу островите Санторини и Аморгос во јужниот дел на Егејското Море. Последниот силен земјотрес беше регистриран вчера наутро и беше со јачина од 5,1 степен според Рихтеровата скала.
Пред овој потрес беа регистрирани и други со јачина поголема од четири степени.
Сите земјотреси се дел од континуираната сеизмичка активност која е во тек од 26 јануари 2025 година, а според податоците од Интердисциплинарниот комитет за управување со опасности и кризи при атинскиот Универзитет, досега биле регистрирани над 19 200 земјотреси, од кои над 16 900 биле посилни од еден степен по Рихтеровата скала.
Поради ваквата состојба, на неколку острови во регионот, меѓу кои и Санторини и Аморгос, е прогласена вонредна состојба, која ќе трае до 14 март.