Полицијата не соопшти колку трактори делумно го блокираат приодот до најголемиот аеродром во Германија, но весникот „Билд“ пренесува дека ги има околу илјада
Протестот со трактори на земјоделцитете кои се противат на укинувањето на даночните олеснувања за дизелот што го користат, денеска го поремети пристапот до аеродромот во Франкфурт, соопшти германската полицијата.
„Сообраќајот околу аеродромот е пореметен. Се замолуваат луѓето кои одат на аеродромот да користат јавен превоз“,
соопшти полицијата во Франкфурт преку социјалната мрежа Икс.
Полицијата не соопшти колку трактори делумно го блокираат приодот до најголемиот аеродром во Германија, но весникот „Билд“ пренесува дека ги има околу илјада.
Аеродормските власти преку својот веб портал ги советуваат патниците да планираат повеќе време за пристигнување, и посочуваат дека редот на летање не е нарушен.
Германија во изминатите денови е погодена од повеќе протести. Неколку аеродроми беа парализирани во четвртокот поради штрајкот на безбедносниот персонал за да се изврши притисок врз колективното договарање во секторот.
Минатата недела земјата беше погодена и од повеќедневен штрајк на машиновозачите на јавното железничко претпријатие Дојче Бан.