Според Зеленски, она што се случува сега е насочено кон Украина, но лесно може да се насочи кон други земји
Украинскиот претседател Володимир Зеленски утрово во францускиот парламент изјави дека Европа е континент во војна и дека Русија нема да ја запре својата агресија на границите на Украина.
„Живееме во време кога Европа, за жал, повеќе не е континент на мирот. Уште еднаш европските градови се уништуваат и селата горат“,
рече Зеленски за руското бомбардирање на Украина во обраќањето пред француските претставници.
Тој, исто така, ги осуди киднапирањата на украинските деца на окупираните територии.
Според Зеленски, она што се случува сега е насочено кон Украина, но лесно може да се насочи кон други земји.
„Ние веќе јасно го гледаме правецот на агресијата: балтичките земји, Полска, Балканот. Рускиот режим не гледа никакви ограничувања, па дури ни Европа веќе не е доволна“,
рече Зеленски посочувајќи на руските воени акции во Сирија и зголеменото присуство на Москва во африканскиот регион Сахел.
Украинскиот претседател смета дека светот бил премногу „исплашен“ за да му одговори на Владимир Путин со сила. Тој во неколку наврати ѝ се заблагодари на Франција за воената и дипломатска поддршка откако претседателот Емануел Макрон синоќа најави испраќање борбени авиони во Киев.
Зеленски истакна дека победата е можна и покрај напредокот на Русите на фронтот.
„Можеме ли да ја добиеме оваа битка? Секако, да“,
увери Зеленски кој првпат зборуваше пред францускиот парламент.