Во украинските медиуми со месеци имаше шпекулации дека Залужни ќе биде единствениот остварлив предизвикувач на Зеленски за претседателската функција доколку се распишат нови избори додека трае војната и се кандидира генералот
Украинскиот претседател Володимир Зеленски вчера побарал од врховниот командант на вооружените сили на Украина, Валериј Залужни, да поднесе оставка, но генералот наводно го одбил барањето, објави денеска „Гардијан“. Се наведува дека Зеленски може наскоро да го разреши Залужни.
„Гардијан“ пишува дека тензиите меѓу двајцата траат со месеци, по неуспехот на летната контраофанзива на Украина.
Олекси Гончаренко, пратеник на украинската опозиција и сојузник на генералот, изјавил дека нема суштински разлики меѓу нив двајца.
„Лично, мислам дека ова е лоша идеја. Нема суштински разлики меѓу нив, но канцеларијата на Зеленски е загрижена поради тоа што Залужни дава политички, а не воени изјави“,
рече Гончаренко.
Според лондонскиот весник, на местото на Залужни најверојатно ќе дојде Кирило Буданов, актуелен шеф на военото разузнавање на Украина, одговорен за тајните операции против Москва.
Францускиот претседател Емануел Макрон, во меѓувреме, ги повика европските лидери да ја забрзаат помошта за Украина во говорот пред Шведската воена академија велејќи дека трошокот за руската победа е превисок за сите нас.
Украинската контраофанзива која започна во јуни не успеа да ги пробие руските линии поради критиките дека нападот се раширил на премногу оски, но според „Гардијан“, се чини дека вистинскиот спор меѓу претседателот и генералот е политички.
Украинскиот генерал е најпопуларната личност во земјата освен претседателот Зеленски и неговата висока положба ја иритирала канцеларијата на Зеленски, особено затоа што политичарот размислувал дали да учествува на нови избори, моментално суспендирани според воената состојба.
Залужни за „Економист“ на почетокот на ноември изјави дека верува оти војната е во ќор-сокак и повика на нова помош од Западот, но неколку дена подоцна Зеленски ја отфрли лошата проценка.
„Сите се уморни, без разлика на нивниот статус. И ние имаме различни мислења. Но, тоа не е ќор-сокак“,
рече тогаш Зеленски, додавајќи дека новопристигнатите западни борбени авиони Ф-16 допрва треба да доведат до пробив во 2024 година.
Во украинските медиуми со месеци се вртеа шпекулации дека Залужни ќе биде единствениот остварлив предизвикувач на Зеленски за претседателската функција доколку се распишат нови избори додека трае војната и се кандидира генералот.
Според „Гардијан“, Залужни никогаш јавно не кажал дека ќе влезе во политиката, но неформалните објави на неговиот фејсбук-профил на кои се прикажани негови фотографии со неговата сопруга биле протолкувани како сигнал за таква намера.
Во ноември, Зеленски ги предупреди генералите да не даваат политички изјави.
Тој смета дека би било голема грешка ако командантите кои управуваат со војната да бидат вклучени во политика или на избори.
Во декември, објавените анкети од „Киев индипендент“ сугерираа дека Залужни е водечки предизвикувач на Зеленски и дека се очекува актуелниот претседател да го победи со малку поени во вториот круг.