Министерството за здравство вечерва соопшти дека Фондот за здравствено осигурување нема да покрива трошоци за промена на полот:
„Ја информираме јавноста дека оперативен зафат за промена на полот нема да постои на сметка на Фондот за здравствено осигурување и таков зафат нема да се изведува во јавна здравствена установа“
Ваквиот став на министерството доаѓа по бурните реакции на изјавата за медиуми на министерот Венко Филипче, која ја даде по средбата на Националната конференција за „Унапредување на правата на ЛГБТ заедницата во Северна Македонија“, настан по повод првата Парада на гордоста која ќе се одржи во сабота во Скопје.
„Дозволете да кажам дека од пред неколку месеци на располагање имаме за трансџендер хирургија на сите наши граѓани е еден врвен експерт од Србија којшто работи во развиени европски земји, којшто работи во Америка и за сметка на фондот тие операции и интервенции коишто досега се праќаа приватно, ќе биде можно да се прават на клиниката за детска хирургија“,
изјави Филипче по средбата.
Во соопштението издадено вечерва се појаснува дека ангажманот на експертот од Србија се однесувал на здравјето на децата.
„Спроведувањето на оперативни зафати од страна на експертот Мирослав Ѓорѓевиќ значи опфаќање на голем број на уролошки операции за заштита на здравјето на децата, кои до сега беа принудувани да патуваат во странство за нивно спроведување.
Со овој ангажман на врвен експерт ќе успееме да заштедиме средства што досега беа одвојувани од Фондот за операциите во странство.
Политика на Министерството за здравство е што повеќе услуги да бидат достапни за граѓаните во Северна Македонија и да се намали потребата од патување во странство и секако да се спроведат повисоки стандарди во медицинските установи во државата, преку ангажирање на експерти кои ќе го пренесат своето знаење на македонските доктори“,
се вели во соопштението на министерстото за здравство.
Последното објаснување на министерството секако не оди во прилог на барањата на трансродовите лица во земјава. Како што објави „360 Степени“ пред две недели, трансродовоста во земјава се третира како ментална болест, додека Светската здравствена организација ја сместува во категоријата сексуално здравје.