Утрешната седница ќе трае 12 часа, вклучително со паузите, а на полноќ треба да биде избран вториот кабинет на Зоран Заев
.
По неколкучасовна расправа и меѓусебни префрлања и дофрлања меѓу опозицискијата и пратениците од мнозинството, спикерот Талат Џафери, нешто пред 20 часот, објави крај на првото „полувреме“ од собраниската седница за избор на новата Влада на СДСМ и на ДУИ.
Пратениците ќе се соберат повторно утре во 12 часот, кога прв говорник треба да биде пратеникот од мнозинствто, лидерот на Демократскиот сојуз Павле Трајанов. Утрешната седница ќе трае 12 часа, вклучително со паузите, затоа што на полноќ треба да биде избран вториот кабинет на Зоран Заев.
Денешната седница почна со еден час задоцнување, во 12, наместо во 11 часот, што предизвика реакција од пратениците на опозицијата.
Како што предвидува сценариото за избор на Влада, прв говореше мандатарот Заев, кој ја образложи пред пратениците Програмата за работа, во периодот до следните избори во 2024 година.
Заев во потенцираше дека оваа негова влада ќе го истера целиот мандат, наспроти пратениците од опозицијата, кои постојано настапуваа со прогнози дека овој кабинет на „Илинденска“ ќе биде со најкус рок на траење. Потпретседателот на ВМРО-ДПМНЕ Александар Николоски најави и масовни демонстрации од есен, што, според него, ќе ја срушат Владата.