Вие не сте командант на Собранието, туку негов претседател, рече Гордана Силјаноска, која го „искара“ Џафери и поради тоа што седницата почна со задоцнување од еден час, а претходно беше закажана во мошне кус рок
Потпретседателот на ВМРО-ДПМНЕ Александар Николоски, кој му беше директен противкандидат на лидерот на СДСМ Зоран Заев, како носители на листите на своите партии во четвртата изборна единица, е првиот пратеник што се обрати во рамки на дискусијата на денешната собраниска седница, веднаш по експозето на мандатарот.
Исто како и неговата сопартијка Гордана Силјановска Давкова, и Николовски, во самиот почеток на дискусијата реагираше затоа што собраниската седница почпна со задоцнување од околу еден час и што парламентот заседава за време на викенд. Како што рече Николовски, несоодветно е седницата да се одржува во сабота и во недела и тоа веднаш по голем верски празник.
Претходно, спикерот Талат Џафери, одговарајќи и на Силјаноска Давкова, посочи дека таа како универзитетска професорка по уставно право треба да знае дека, според Уставот, Собранието е во постојано заседание.
Силјаноска, пак, возврати дека тоа значи оти македонскиот парламент не работи во сесија, како што е практика во други парламенти во светот.
„Вие не сте командант на Собранието, туку негов претседател“,
му се обрати Силјаноска на Џафери, критикувајќи го и зашто дозволил седницата да почне со толкаво задоцнување, но и затоа што ја закажал многу брзо откако мандатарот го достави предлогот до пратениците.
Спикерот возврати дека не може во 11 часот да има и координации на пратеничките групи и седница.
„Почитувана пратеничке, јас сум тука пред 9 часот. Пратениците доцнеа. Во Деловникот, пак, има една точка која вели дека претседателот може да ја свика седницата за избор на Влада и во рок пократок од 10 дена, ако смета дека тоа е неопходно“,
рече Џафери.