На овој гасоводен крак се очекува наредната година да има спојување со интерконекторот со Грција од Неготино до границата во должина од 67 километри
Градежните работите за изградба на магистралната гасоводна делница Неготино-Кавадарци-Битола денеска официјално се завршени. Делницата е во должина од 92 километри со мерни станици Индустриска зона Кавадарци, Прилеп и Битола. Вредноста на инвестицијата е 36 милиони евра и е еден од најзначајните капитални проекти.
„Со завршувањето на градежните работи ја спојуваме целата делница од Куманово до Битола во должина од 188 километри. Се исполнува планот за реализација на големиот проект за гасификација на државата. Во изминатиот период, со посветена работа на сите вработени во НЕР, успешно е завршена реализацијата на делницата Штип-Неготино во должина од 36 километри, а во завршна фаза е делницата Скопје – Тетово – Гостивар во должина од 76 километри и кракот Тетово во должина од 10 километри“,
изјави премиерот Димитар Ковачевски, кој ја посети локацијата каде што се заокружува проектот, а беше придружуван од министерот за транспорт и врски Благој Бочварски и директорот на Национални енергетски ресурси Бајрам Реџепи.
Гасификацијата, според Ковачевски, значи придобивка за граѓаните, компаниите, за индустриските зони, а има големо влијание и врз заштитата на животната средина. Компаниите од овој регион сега можат да прават планови за користење гас во нивните производствени капацитети и на тој начин да бидат поконкурентни од компаниите во регионот, додаде тој.
Тој посочи дека токму на овој гасоводен крак, се очекува наредната година да имаме спојување со интерконекторот со Грција, од Неготино до границата со Грција во должина од 67 километри.
„Со овој проект, и со досега завршената делница, Северна Македонија ги исполнува условите да биде транзитна земја, но и да заработува од транзитот на природен гас. Веќе се работи на техничка документација на нови интерконективни гасоводи со Србија и со Косово за што веќе добивме поддршка од Европската унија. Со овој проект добиваме пристап до природен гас од Азербејџан и истиот ќе се користи и во Северна Македонија, а и во земјите од регионот“,
рече премиерот
Директорот на НЕР, Реџепи, потенцира дека гасоводната делница веќе се спојува со сегашниот оперативен гасовод на ГА-МА.
„Се надеваме дека во вториот квартал следната година ќе добиеме одобрение за употреба на целата делница и конечно за наредната зима цел регион да има можност да се приклучи на природен гас, особено големите индустриски објекти“,
рече Бајрами.