Инспектори од Државниот пазарен инспекторат (ДПИ), Управата за јавни приходи (УЈП), Државниот инспекторат за труд, Дирекцијата за заштита и спасување (ДЗС) и Агенцијата за храна и ветеринарство (АХВ) во рамките на своите надлежности утврдиле неправилности поврзани со непријавени работници, работење без потребни одобренија, неиздавање фискални сметки, нерегистрирана дејност, промет во девизи, како и недостатоци во хигиенските услови и противпожарната заштита
Присуство и точење алкохол на малолетници по полноќ, кршење на Законот за заштита од пушење, обезбедувач без лиценца, странски државјани со нерегулиран престој во државата и незаконско приредување игри на среќа. Ова се дел од неправилностите што ги констатирале екипи на Одделот за криминалистичка полиција и секторите за внатрешни работи во координирани контроли со надлежни инспекциски органи спроведени викендов во 66 угостителски објекти и казина.
Во акциската контрола, како што соопштија денеска од Министерството за внатрешни работи (МВР), биле легитимирани 38 лица, преглед бил извршен врз 61 патничко моторно возило, а утврден бил идентитет на 31 лице.
Во еден од објектите каде била извршена контрола, полицајците и инспекторите од повеќе државни институции, затекнале лице кое вршело обезбедување без да поседува лиценца и легитимација, а во друг, пак, бил нарушен јавниот ред и мир.
Биле изречени три глоби поради прекршување на Законот за заштита од пушење, едно лице е приведено оти одбило да се легитимира, додека тројца странски државјани завршиле во полициска станица бидејќи немале регулиран престој во државата.
„Во еден објект се затекнати четири малолетни лица по 24:00 часот, а во два објекти е констатирано точење алкохол на малолетници“,
се наведува во соопштението од МВР.
Екипа на сообраќајната полиција на патот во близина на прилепското село Мажучиште запрела и привела лице кое управувало возило со 2,04 промили алкохол во крвта. Возачот, како што велат од МВР, е приведен поради сомнение за сторено кривично дело безобѕирно управување со моторно возило од член 297-а од Кривичниот законик (КЗ).
Во рамките на активностите, што биле спроведени на територијата на целата држава, Одделението за внатрешни работи (ОВР) Кичево извршило претрес на локација каде незаконски се приредувале игри на среќа, при што биле затекнати две лица и се одземени предмети поврзани со случајот, за кој, како што додаваат од МВР, ќе биде поднесена соодветна пријава.
Инаку, во контролите, покрај полицијата, учествувале и инспектори од Државниот пазарен инспекторат (ДПИ), Управата за јавни приходи (УЈП), Државниот инспекторат за труд, Дирекцијата за заштита и спасување (ДЗС) и Агенцијата за храна и ветеринарство (АХВ). Нивните службеници, според МВР, утврдиле неправилности поврзани со непријавени работници, работење без потребни одобренија, неиздавање фискални сметки, нерегистрирана дејност, промет во девизи, како и недостатоци во хигиенските услови и противпожарната заштита.
Во рамките на своите надлжености, службениците презеле соодветни мерки и санкции во врска со констатираните неправилности, велат од МВР.
Од Министерството додаваат дека и во наредниот период ќе продолжат со засилени и координирани контроли во угостителските објекти и казината, во соработка со надлежните институции, со цел откривање и санкционирање на незаконските дејствија, доследно почитување на законите и поголема безбедност на граѓаните.