„Иранската револуционерна гарда мора да биде признаена како терористичка организација. На Иран мора да му се воведат болни санкции, вклучително и за ракетите. Израел има право да се брани од масовниот напад на Иран. Израел успешно се бранеше од иранската агресија и ќе продолжи да го прави тоа и во иднина“, соопшто портпаролот на израелското МНР
Во тек е средбата на Воениот кабинет со кој претседава израелскиот премиер Бенјамин Нетанјаху, на која ќе се донесе одлука за понатамошните чекори.
Израелскиот министер за надворешни работи Израел Кац во интервју за армиското радио истакна дека внимателно се одмеруваат чекорите по големиот напад од Иран.
„Рековме: Ако Иран го нападне Израел, ние ќе го нападнеме Иран. И таа посветеност сè уште важи“,
посочи Кац.
Тој додаде дека за евентуалниот одговор ќе се дебатира на средбата на Воениот кабинет што е закажана за 15 часот и 30 минути по локално време и на неа „ќе бидат донесени соодветни и исправни одлуки“.
Израелското Министерство за надворешни работи ја наведе „почетната цена“ за која вели дека Иран мора да ја плати за нападот.
„Иранската револуционерна гарда мора да биде признаена како терористичка организација. На Иран мора да му се воведат болни санкции, вклучително и за ракетите. Израел има право да се брани од масовниот напад на Иран. Израел успешно се бранеше од иранската агресија и ќе продолжи да го прави тоа и во иднина“,
изјави портпаролот Лиор Хајат.
Повеќе од 300 ирански ракети кои биле истрелани од иранска територија за време на петчасовниот напад, биле пресретнати пред да стигнат до Израел, на повеќе од 1 770 километри од локациите за лансирање.
Во текот на ноќта, Иран лансираше околу 170 беспилотни летала, повеќе од 30 крстаречки ракети и повеќе од 120 балистички ракети, соопшти израелската војска.
Во телефонски разговор, американскиот претседател Џо Бајден му рекол на израелскиот премиер Бенјамин Нетанјаху дека тоа е победа за Израел бидејќи ништо „вредно“ не е засегнато, изјави висок претставник на американската администрација за Си-ен-ен.