Западноафриканските лидери се заканија со воена акција против нигериската хунта откако таа ја презеде власта со државен удар минатата недела. Како што пренесе Би-би-си, лидерите дадоа рок од седум дена пучистите да го вратат претседателот Мохамед Базум, кој се наоѓа во заробеништво.
Претходно, хунтата предупреди дека ќе се спротивстави на секој „план за агресија против Нигер“ од страна на регионалните или западните сили.
Во меѓувреме, стотици поддржувачи на пучот протестираа пред француската амбасада во главниот град Ниамеј.
Водачите на Ековас, блокот на западноафриканските нации, одржаа кризни разговори во главниот град на Нигерија, Абуџа, за да разговараат за најновиот државен удар кој следи по преземањето на војската во соседните Мали и Буркина Фасо.
Во соопштението прочитано по самитот се вели дека Ековас има „нулта толеранција“ за државни удари.
„Регионалниот блок ќе ги преземе сите неопходни мерки за враќање на уставниот поредок доколку неговите барања не бидат исполнети во рок од една недела. Таквите мерки може да вклучуваат употреба на сила, а воените началници треба веднаш да се состанат за да планираат интервенција“,
се наведува во соопштението.
Специјалниот претставник и шеф на Канцеларијата на Обединетите нации за Западна Африка беше на состанокот и рече дека Ековас презема решителна акција, бидејќи настаните во Нигер биле загрижувачки, пренесе Би-би-си.