Техничкиот премиер вели дека кога постапката ќе потврди нешто друго се преземаат соодветни одговори и постапки согласно процедурата
Ако нема врзан потпис, наредбите се поништуваат, вели техничкиот премиер Талат Џафери за вчерашната одлука на владината седница со која се поништуваат пет наредби за кадровски прераспределувања и распоредувања во подрачни сектори на Министерството за внатрешни работи (МВР) и во Бирото за јавна безбедност донесени од министерот Панче Тошковски.
„Законот е јасен дека треба да има врзан потпис. Формално, ако нема врзан потпис, се поништуваат, после постапката кога ќе потврди нешто друго се преземаат соодветни одговори и постапки согласно процедурата“,
рече Џафери денеска одговарајќи на новинарски прашања по увидот на активностите за обнова на автопатската делница Катланово-Петровец.
Според Џафери, сега засега такви се процедурите во законот.
Незадоволството од вчерашната владина одлука денеска преку статус на Фејсбук го изрази министерот за внатрешни работи во техничката влада Панче Тошковски кој напиша дека станува збор за скандалозна одлука и спротивна на законите.
Тошковски, коментирајќи ја вчерашна владина одлука со која е направено поништување на пет наредби, со образложение дека биле потпишани со едностран потпис, односно само со потпис на техничкиот министер, а без потпис на дополнителниот заменик-министер за МВР во техничката владата, Митко Бојмацалиев, вели оти е нешто што, според образложението на владината прес-служба, било спротивно на законските прописи за организирање на парламентарните избори.
Според министерот Тошковски, ваквите одлуки ќе ја отежнат работата во одредени сектори на ресорното министерство, кое во следниот период треба да биде гарант за одржување мирен и демократски изборен процес.
Владата вчера на седница поништила пет наредби за кадровски прераспределувања и распоредувања во подрачни сектори на Министерството за внатрешни работи (МВР) и во Бирото за јавна безбедност бидејќи биле со едностран потпис, односно биле потпишани само од техничкиот министер за внатрешни работи Панче Тошковски.
Ваквите акти Владата ги прогласи за ништовни, како второстепен орган по укажување на дополнителниот заменик на министерот за внатрешни работи Митко Бојмацалиев.