Очекувано, од овој состанок на Советот за општи работи на ЕУ нема деблокада на пристапниот процес за земјава, а во заклучоците се нагласува дека со нетрпение се очекува да се одржат првите меѓувладини конференции со Република Северна Македонија и Албанија што е можно поскоро откако ќе бидат одобрени преговарачките рамки
Во текстот на заклучоците, за земјава секаде се користи долгото име – Република Северна Македонија (најверојатно на инсистирање на Бугарија) додека другите држави се именувани со кратките имиња
Државните институции да ги почитуваат препораките на Државната комисија за спречување корупција (ДКСК) и да се продолжи со реформите за кои е потребен ангажман и од власта, но и од опозицијата, се дел од препораките кои ги дава Советот за општи работи на ЕУ во заклучоците усвоени денеска во Брисел.
Во однос за почетокот на преговорите, пак, очекувано нема деблока од страна на Република Бугарија, а Советот нагласува дека „со нетрпение очекува да се случи првата меѓувладина конференција“.
„Советот со нетрпение очекува одржување на првите меѓувладини конференции со Република Северна Македонија и Албанија што е можно поскоро откако ќе се одобрат преговарачките рамки од Советот“,
пишува во заклучоците.
Советот на ЕУ е тело во кое се претставени сите 27 земји членки и во кое, на тема проширување, одлуките се носат со консензус, односно секоја членка има право на вето.
ДКСК имаше проактивна улога за спречување на корупцијата, да се почитуваат нејзините препораки
Во делот за правосудството и борбата против корупцијата во Северна Македонија од Советот го поздравуваат постигнувањето на одреден напредок во имплементација на стратегијата за реформи на правосудството и нагласуваат дека фокусот треба да биде ставен на постојана примена на постоечките стратегии и закони во согласност со стандардите на ЕУ.
Во однос на борбата против корупцијата, пак, се нотира оти се забележани напори во таа насока, вклучително и со случаи на корупција на високо ниво, а се испраќа и порака дека треба да се почитуваат препораките на ДКСК.
„Советот ја нагласува важноста засегнатите институции да ги следат препораките на ДКСК, која беше посебно проактивна во спречувањето на корупцијата“,
пишува во заклучоците на Советот.
Реформи поддржани и од власта и од опозицијата
Зборувајќи за владеењето на правото и борбата против корупцијата и организираниот криминал, исто така, се констатира одреден напредок, како и дека има посветеност од Владата да се забрза спроведувањето на реформите поврзани со ЕУ. Тие, нагласуваат од Советот, треба да се поддржани и од опозицијата.
„Одржливоста на овие реформи е долгорочен процес кој бара континуиран ангажман и од власта и од опозицијата. Советот ги охрабрува сите страни да продолжат да ги продлабочуваат реформите и да го подобрат конструктивниот дијалог“,
се нагласува во заклучоците од Советот.
Што се препорачува за јавната администрација и економските политики
Во заклучоците од Советот нотиран е и одреден напредок во јавната администрација, за што исто така се нагласува оти е од суштинска важност да се запазат принципите на транспарентност и правична застапеност, вклучително и преку подобрување и имплементација на законските рамки.
Кога се во прашање економските реформи, Советот испраќа охрабрување до земјава да продолжи да ги исполнува барањата на внатрешниот пазар на ЕУ и да се справува со конкурентскиот притисок и пазарните сили во Унијата. Исто така, оттаму охрабруваат да се имплементираат политиките утврдени во заклучоците од економскиот и финансискиот дијалог.
Во однос на разузнавачките и безбедносните служби, пак, Советот на ЕУ констатира дека е спроведена сеопфатна реформа во соработка со НАТО и партнерите, но порачува и дека треба да се зајакне парламентарниот надзор над овие служби.
Да се имплементираат препораките од ОБСЕ/ОДИХР и Венецијанската комисија за изборите
Советот на ЕУ се осврнува и на локалните избори кои се одржаа во октомври за кои констатира дека, според ОБСЕ/ОДИХР, биле конкурентни и се почитувале основните слободи и права, меѓутоа се посочува и дека има бројни недостатоци во правната регулатива поради што е потребно да се преиспитаат законите кои се однесуваат на изборите.
„Советот ја нагласува важноста властите навремено и на инклузивен начин да продолжат да ги адресираат преостанатите препораки од ОБСЕ/ОДИХР и Венецијанската комисија“,
порачуваат од Советот.
Во однос на пописот, пак, се поздравува тоа што тој бил завршен и се нагласува оти се очекува резултатите да бидат објавени во наредните месеци.
Да се почитуваат Преспанскиот и Договорот со Бугарија
Во заклучоците, Советот се осврнува и на добрососедските односи и регионалната соработка за кои нагласува дека остануваат меѓу суштинските елементи важни за процесот на проширување, како и за процесот за стабилизација и асоцијација.
Исто така, Советот посетува и дека е важно да се постигнат опипливи резултати и со спроведувањето на билатералните договори, вклучително и Договорот од Преспа со Грција и Договорот за добрососедски односи со Бугарија.