Според весникот „Билд“, напаѓачот бил студент и откако повредил неколку лица, го свртел оружјето кон себе
Млада жена им подлегнала на повредите здобиени во денешниот вооружен напад на Универзитетот во Хајделберг, додека уште три други лица се повредени, се најновите податоци на германските безбедносни извори, кои прецизираат дека напаѓачот си го одзел животот, пишува германски „Билд“.
Полицијата првично соопшти дека четири лица се повредени во денешниот напад, кој го извршил маж и подоцна извршил самоубиство, изјави извор цитиран од „ДПА“.
„Млада жена почина во болница од здобиените прострелни рани“,
изјави попладнево извор од германските безбедносни сили за француските медиуми.
Нападот на најстариот универзитет во Германија бил извршен во амфитеатар и полицијата верува дека напаѓачот дејствувал сам.
„Веруваме дека имало само еден сторител. Засега не гледаме опасност за јавноста“,
соопшти полицијата еден час по првичната пријава за настанот.
Според весникот „Билд“, напаѓачот бил студент и откако повредил неколку лица, го свртел оружјето кон себе.
Неговиот идентитет не е објавен, а истражителите велат дека тој немал верски или политички мотиви. Се очекува истрагата да даде подетални информации за овој инцидент.