Премиерот посочи дека има 46 години и дека е нормално некогаш при пишување да го повтори она што го го пишувал сите овие години
Јас сум првиот што го почитува и го спроведува Преспанскиот договор што го потпишавме со мојот драг пријател Алексис Ципрас и кој донесе многу бенефити за граѓаните на С Македонија и на Грција, изјави денеска премиерот Зоран Заев коментирајќи го твитот за македонската репрезентација кој наиде на реакција во Грција, така што е најавено замрзнување на ратификацијата на меморандумите со нашата земја во грчкиот парламент.
„Во однос на твитот, вистина е дека имаме македонски играчи, албански играчи или бошњачки играчи. Имаме Македонци како играчи, но и репрезентација на Северна Македонија. Тоа е вистината во однос на Преспанскиот договор. Но тоа не треба да е причина за замрзнување на меморандумите во грчкиот парламент. Ние чекаме две години на тие меморандуми и можеме да почекаме уште три месеци. Но нашите граѓани Македонци и Грци го очекуваат тоа, затоа што тоа е важно за економската соработка, за сообраќајот меѓу двете земји… Грција и практично ја поддржува евроинтеграцијата на С Македонија. Нè поддржаа и на Советот за општи работи. Грција и во практика се бори заедно со со своите соседи С Македонија и Албанија на патот кон ЕУ. Јас секогаш испраќам пораки на пријателство, затоа што верувам дека Преспанскиот договор што го постигнавме со мојот драг пријател Ципрас донесе бенефити за двете страни. Јас сум првиот што го почитува и спроведува Преспанскиот договор. Нормално, некогаш се случува превид. Ама јас сум 46-годишен човек, нормално е нешто што си го повторувал толку време да го повториш при пишување“,
изјави Заев нагласувајќи дека ќе продолжи посветено да го спроведува договорот од Преспа.
Грчкиот весник „Катимерини“ објави дека Грција го замрзнува ратификувањето на меморандумите за соработка со Северна Македонија поради објава на Заев на Твитер за фудбалската репрезентација, во која не го користи уставното име на државата. „Катимерини“ пишува дека станува збор за три меморандуми што парламентот требало да ги ратификува идниот месец, на 10 јули, но дека сега процесот ќе биде одложен, најверојатно, за септември, а можеби и за подоцна. Повикувајќи се на владини извори, „Катимерини“ пишува дека грчката влада не може да „замижи“ пред „двојната игра“ на „соседите“, потенцирајќи дека изминатиов период имало неколку „инциденти“ поврзани со Договорот.
Во „твитот“ од понеделникот, кој ја налути грчката влада, Заев напиша дека фудбалскиот натпревар го следи заедно со холандскиот премиер и дека без оглед на резултатот ѝ дава поддршка на „македонската фудбалска репрезентација“.
Во почетокот на 2021 година, опозициската Сириза во Грција реагираше поради тоа што доцни ратификацијата на трите меморандуми со Северна Македонија, кои стигнаа во грчкиот парламент во септември минатата година.
„Кога меморандумите со Северна Македонија ќе дојдат на гласање во парламентот? Како ќе се решат значителните доцнења за учебниците и трговските ознаки“,
прашува Јоргос Катругалос од Сириза во пратеничко прашање што во јануари годинава го достави до шефот на грчката дипломатија Никос Дендиас.
Меморандум за забрзување на процесот на интеграција на Северна Македонија во ЕУ; Меморандум за формирање координативен комитет за економска соработка и Техничка спогодба за надгледување на FIR Скопје, се трите потпишани меморандуми меѓу Северна Македонија и Грција што произлегуваат од Договорот од Преспа, а кои лани во септември беа оставени во грчкиот парламент, по што беше најавена нивна ратификација откако ќе ги поминат предвидените процедури.