Премиерот Зоран Заев и на денешната прес-конференција рече дека неговиот оптимизам во врска со спорот со Бугарија се должи на тоа што се прави сѐ за да се најде решение, но истовремено и порача дека има работи за кои не се преговара никаде во светот, па нема да се преговара ниту тука.
„Преку оптимизам испраќаме порака дека правиме сè за да постигнеме решение, јас сум истиот тој што пред еден месец на празникот 11 Октомври го запознав народот дека е можно да немаме решение, односно дека е можно да не се одржи првата меѓувладина конференција помеѓу Северна Македонија и ЕУ. Правиме напори до последен момент, ќе дадеме сè што може од наша страна како енергија, памет и мудрост, но знаете дека има работи за кои никаде во светот не се преговара. Тоа го сфаќа и бугарската страна, сфаќа дека нашиот идентитет и нашиот македонски јазик се наше чувство и право, државите не преговараат за оваа работа. Ние продолжуваме да изнаоѓаме решение кое секако би било прифатливо за двете страни, но дефинитивно стојам и денеска на тоа дека постои можност да не добиеме прва меѓувладина конференција со ЕУ“,
изјави Заев.
На оваа тема тој зборуваше и за тоа што власта избегнува собраниска расправа, како што бара опозициската ВМРО-ДПМНЕ, при што порача дека би било неодговорно во период кога се очекува одлуката да се прави нешто што ќе предизвика непријатни ситуации и ќе даде основи за непостигнување договор. Во таа насока, порача Заев, не треба да се прави политикантство од нешто што е стратегиски интерес за државата.