По средбата со грчкиот колега Киријакос Мицотакис во Атина, премиерот Зоран Заев во интервју за МИА вели дека тој сака да дојде во Скопје, а од неговото последно доаѓање во земјава пред 20 години има убави спомени.
„Грчкиот премиер Киријакос Мицотакис сака да дојде во Скопје, затоа што сака да се потсети на тогашните години 1999-2000 кога бил главен, одговорен на Националната банка на Грција за аквизицијата или купувањето на Стопанска банка – Скопје. Тој има убави спомени од тој период. Нема дојдено од тогаш“,
вели Заев во интервјуто што МИА целосно ќе го објави во текот на денот.
Заев изминатите два дена беше во Атина, каде што учествуваше на конференција и угледниот магазин „Економист“, а за време на престојот имаше и средби со Мицотакис и со грчката претседателка Катерина Сакеларопулу.
Вчерашната средба на двајцата премиери е трета по ред од смената на власта во Грција, а прва по изборите во земјава. На средбата, како што вчера соопштија од владината прес-служба, двајцата премиери заклучиле дека односите меѓу Северна Македонија и Грција се трансформираа во сојузништво, кое е потврдено и со членството на нашата земја во НАТО.
*Поврзани вести:
(ФОТО) Заев и Мицотакис седнаа на иста маса во Атина
(ФОТО+ВИДЕО) Средба зад маски на Заев и Мицотакис: Сега сме сојузници