Бундестагот ќе донесе одлука во септември за одобрување на старт на преговорите со ЕУ со нашата земја Северна Македонија. Така вели премиерот Зоран Заев во неговата прва изјава по средбата со германската канцеларка Ангела Меркел, претпладнево во Берлин.
Во најголем дел, остатокот на изјавата е идентичен со соопштението кое го издаде Владата на пладне. Интегрално, премиерот Зоран Заев изјави:
„Со канцеларката Меркел имавме срдечна и пријателска средба, каква што личи меѓу земји стратешки партнери по многу прашања од заеднички интерес. Канцеларката Меркел информираше дека Бундестагот ќе донесе одлука во септември за одобрување на старт на преговорите на ЕУ со Северна Македонија, согласно утврдените процедури на СР Германија за прашањата за проширување на унијата.
изјави премиерот Зоран Заев
На средбата канцеларката потенцираше дека Северна Македонија го испорача очекуваното и дека таа и Берлин на тоа гледаат многу позитивно. Драго ми е што денеска од високо почитувани и влијателни пратеници од Бундестагот и ЦДУ исто така беше потврдено токму тоа истото преку изјава.
Од наша страна потврдивме дека Република Северна Македонија има целосна доверба во канцеларката Меркел и ја поддржува нејзината политика за процесот на проширување на ЕУ, како и нејзината политика кон Западен Балкан. Јас целосно и верувам на канцеларката Меркел.
На средбата нагласивме дека радува фактот што Министерството за надворешни работи на СР Германија има позитивен став за нашата земја во однос на започнувањето на преговори за членство во ЕУ, и дека треба да се испочитуваат процедуралните постапки и демократските процеси кои ќе овозможат Бундестагот да донесе позитивна одлука во септември.
Силно сме уверени дека оваа година започнуваме преговори за членство со ЕУ и им се придружуваме на Србија и Црна Гора.“
Оваа изјава премиерот ја даде за владината прес-служба. Новинарите немаа можност да постават прашања.