Пријателите треба да се поддржуваат, а не да се блокираат, рече премиерот Зоран Заев на дебатата организирана од американскиот тинк-тенк Атлантски совет на тема „Северна Македонија на прагот на Европа“.
Во врска со моменталната ситуација со македонско – бугарските односи, Заев рече дека позицијата на Бугарија е непринципиелна и спречи овозможување на првата меѓувладина конференција со ЕУ со што требаше да биде означен почетокот на преговорите.
„Нашиот став е дека пријателите не треба меѓу себе да се блокираат. Напротив тие треба си помагаат. Бугарија мора да разбере дека имаме суверено право да се определиме и чувствуваме како Македонци кои зборуваат македонски јазик, а со тоа да се почитуваат и сите европски идентитети кои ги имаме во нашата земја. Сметам дека нивниот сегашен став е анахрон и е спротивен на меѓународното право. Ние како држава ќе продолжиме да ги правиме сите напори да постигнеме надминување на проблемите, притоа почитувајќи се себе си и останатите. Нашата држава е Европа во мало“,
рече Заев.
Според него, меѓу Скопје и Софија ќе бидат изградени уште повеќе мостови на соработка во разни сектори.
„За нас е во интерес да продолжи дијалогот, а не да дојде до замрзнување на преговорите, но сепак постојат некои црвени линии кои ние не можеме да ги поминеме“,
рече Заев.
Тој додаде дека за земјите од Западен Балкан нема друга алтернатива освен влез во Европската унија и НАТО.
„Со вербата за членство во НАТО и ЕУ ние го сменивме нашиот Устав, а со тоа и нашето уставно име. Навистина не беше лесно, беше едно горчливо чувство, можете да замислите колку е тешко да додадете нешто на вашето име, но тоа го направивме заради младите луѓе, заради децата и изградивме големо пријателество со нашиот сосед Грција“,
додаде премиерот.