Премиерот и претседател на СДСМ, Зоран Заев, вечерва во Скопје ја отвори првата од карванот трибини на владејачката партија под слоганот „Најдоброто за нашата општина“. Заев се осврна на актуелната состојба со процесот на евроинтеграциите и надминување на “нелогичните блокади” на патот кон ЕУ.
„Ви носам поздрави од Париз, од главните градови на цела Европа, преточени поздрави во силна и искрена поддршка за нашата татковина, чиј главен град е ова наше убаво Скопје! Скопје е гордо и почитувано кога Северна Македонија е горда и почитувана. За нас е многу важно што земјите членки на ЕУ, меѓу кои и Франција, го поддржуваат процесот на интеграција во ЕУ. Пред нас е самитот на Европскиот Совет во јуни, вистинска можност за чекор напред и за решение кое ќе ја оттргне блокадата на нашиот европски пат. Дијалогот носи решенија, а најважното просперитетно решение сега за нас е решението за почеток на преговорите, одобрен од сите земји членки на ЕУ“,
кажа Заев.
Тој истакна дека државата направила се што треба во процесот на реформи и исполнување на критериумите и дека сега на ред е Европската Унија.
„Направивме се, сработевме, ги исполнивме сите критериуми, на ред е ЕУ да испорача. Подготвени сме за билатерален дијалог кој ќе донесе разумен и заемно прифатлив договор во рамките на Договорот за пријателство и добрососедство со Бугарија. Секако, прашањата за македонскиот јазик и идентитет не се и не може да бидат на која било маса. Се бориме за иднината на земјата и ќе направиме се за неа. Да се бориш за својата земја, за својот народ, за својат град, општина, е привилегија, чест, одговорност“,
кажа Заев.
Вчера Заев, Димитров и Османи имаа работна вечера со францускиот претседател Емануел Макрон.
Францускиот претседател во заедничката изјава со премиерот Зоран Заев пред Елисејската палата во Париз порача дека нашата држава заслужува да ги почне преговорите со ЕУ без одложување.
Макрон кажа и дека двете земји одржуваат доверливи односи на соработка од независноста на Северна Македонија, потсетувајќи дека Франција придонесе во мировното решение на меѓуетничкиот конфликт во земјата што доведе до Охридскиот договор.