Лидерот на СДСМ пред сестринските партии ги презентирал мерките што ги презема владата за справување со последиците од кризата со коронавирусот
Претседателот на СДСМ, Зоран Заев, како што соопштија од партијата, денес учествувал на видеоконференција на Партијата на европските социјалисти. На состанокот, лидерите на европските социјалдемократи и социјалисти ги презентирале мерките што се преземаат во нивните земји и ги споделиле најдобрите практики.
Заев, како што информираат од партијата, ги презентирал мерките што владата предводена од СДСМ ги има преземено до овој момент и мерките што се планира да се преземат во зависност од тоа како ќе прогресира ситуацијата со коронавирусот.
„Еден од главните фокуси и практики се насочени кон зачувување на работните места во услови на очекувана економска криза и рецесија, како и одржување во кондиција на реалниот сектор преку субвенции и мерки кои ќе му овозможи на секторот брзо закрепнување. Заев ги презентираше мерките со кои на сите вработени во приватниот сектор ќе им се гарантира минимална плата субвенционирана од државата, како и даночни олеснувања за сите компании зафатени од кризата“,
информираа од СДСМ.
Како што се наведува, првпат на ниво на ЕУ се размислува за воведување европски здравствен фонд и европски фонд за невработени, како одговор на очекуваната криза и неопходна поддршка на здравствените и социјалните системи. Сите се согласиле дека ЕУ мора да биде флексибилна, прагматична, брза и достапна за државите членки, но и за државите кандидатки.
Лидерите на ПЕС се согласиле дека солидарноста е основна димензија која сега мора да ги обедини сите на континентот и дека ќе продолжи на дневна основа размената на позитивни практики со цел брзо и ефикасно надминување на кризата.
Претседателот на ПЕС, Сергеј Станишев, како што е пренесено на интернет-страницата на оваа политичка групација, рекол дека моментно главна цел е контрола на пандемијата и заштита на животите. Но, на краток и среден рок, посочил, мора да се осврнеме и на социоекономскиот исход. Потребен е долгорочен план за обнова на деловните активности.
Лидерот на СДСМ, пред неколку дена, презентираше серија предлози за надминување на социо-економските последици од кризата со коронавирусот, со што предизвика низа реакции од синдикатите, но и од опозицијата, посебно поради предложеното двомесечно израмнување на платите на административците на ниво на минималец. . Тој вчера изјави тоа се само предлог-мерки, што не значи дека владата ќе ги прифати во целост.