Проекциите на Владата за економски раст се на линија со проекциите на ММФ (3,8 проценти), на Народна банка и на ЕК, како што е заклучено на денешниот онлајн-состанок
Економскиот раст, согласно проекциите на Владата, ќе остане на 4,1% за 2021 година, што е на линија со проекциите на ММФ од 3,8%, Народната банка од 3,9% и на Европската комисија од 3,7%, посочил премиерот Зоран Заев на денешната онлајн-средба со шефицата на мисијата на Меѓународниот монетарен фонд (ММФ) за С Македонија, Берглјот Бјорнсон Баркбу, резидентната претставничка на ММФ за Западен Балкан, Штефани Ебле и економисти на ММФ во Вашингтон.
Како што соопшти владината прес-служба, на состанокот се дискутирало за изгледите за економски раст во земјава, согласно разговорите што ги имаше мисијата на ММФ во последниве десеттина дена. Во фокус беше монетарната и фискалната политика, како и инвестицискиот план и среднорочната фискална стратегија.
„Заев истакна дека високо ја цени соработката со ММФ и сите препораки во насока на континуиран економски напредок и креирање поволен деловен амбиент. Тој се осврна на досегашните заложби и мерки на Владата за справување со ефектите од пандемијата, кои дадоа добри резултати, се поддржаа стопанството, работните места, како и ранливите категории граѓани. Заев информираше и за позитивните трендови во земјата, кои даваат сигнал на стабилизирање на економија, зајакнување на довербата кај инвеститорите, како и за растот на извозот, на индустриско производство, внатрешниот промет, како и на просечната месечно исплатена нето-плата“,
се наведува во владиното соопштение од состанокот.
Заев нагласил дека заложбите на Владата се насочени кон економски развој, со фокус на енергетска транзиција, инвестиции во обновливи извори, гасификација.
На состанокот се дискутирало и за придобивките од влезот во НАТО, што за инвеститорите е позитивен сигнал бидејќи ја зголемува предвидливоста и сигурноста на деловниот амбиент за нови инвестициски вложувања кои веќе се најавени во земјава.
„На состанокот е заклучено и дека со стивнувањето на пандемијата и масовната вакцинација се дава силен стимул дека економијата се враќа на патеките на раст“,
се наведува во соопштението.