И Заев и Мицкоски се убедени дека ќе победат нивните кандидати за градоначалници. Тие ветуваат позитивна изборна кампања без оцрнување на политичките опоненти
Лидерите на двете најголеми политички партии во земјава вечерва си ветија дека ќе водат фер и дмеократска кампања за претстојните локални избори во октомри. Премиерот и лидер на СДСМ, Зоран Заев и лидерот на опозициската ВМРО-ДПМНЕ, Христијан Мицкоски, на крајот од ТВ-дуелот на Канал 5 си подадоа рака ветувајќи дека ќе водат позитивна кампања со промоција на проекти и личности наместо да го оцрнуваат политичкиот опонент.
„Ние ќе победиме и на градоначалничките места, во вкупен број, и во вкупен број на советничките места во државата, и во вкупен број на гласови, а ќе победиме и во градот Скопје. Затоа што сме Влада која помогнала на општините и искрено верува во општините“,
рече Заев.
Нивниот став, како што рече премиерот, е да го понудат најдоброто за секоја општина и во делот на кандидатите за градоначалници и во делот за советници, како и најдобрите програми.
„Анкетите што го покажуваат трендот како се случува, така ќе се случи и на овие избори, јас немам дилема. Затоа што треба да спроведеме успешна кампања, да ги доближиме сите проекти, идеи, визии, а секако и личноста на кандидатите пред граѓаните за да може да ги мотивираме да излезат на гласање и да изберат што е најдоброто за нивната општина. Во еден таков аспект настапуваме и со најбројната коалиција, ние сме со 22 политички партии, дополнително, ДУИ, БЕСА и ДПА и тоа е Коалиција на иднината“,
рече Заев.
Од друга страна, како што рече, е „коалиција која ја нарековме политички брак која ќе доживее развод“.
„Мислам на Коалицијата на ВМРО-ДПМНЕ и Алијанса за Албанците и Алтернатива. Сите знаат дека е неприродна и направена за политички цели да се направат максимални обиди колку што може поизвесно да се направи исполнување на желбата да се биде на власт“,
рече Заев.
Мицкоски, пак, истакна дека победата на опозицијата на овие локални избори не е доведена под знак прашање.
„Тоа е крајот на оваа Влада предовдена од СДСМ и ДУИ и јас сум убеден, не само за тоа што граѓаните навистина тоа ќе го кажат туку затоа што едноставно не сме сите исти. Дека сме различни и дека тоа што ние го нудиме е еден нов квалитет, луѓе кои за првпат ќе ја бараат довербата на граѓаните, најгоемиот дел од кандидатите за градоначалници кои ги предложи коалицијата предводена од ВМРО-ДПМНЕ за првпат настапуваат 95 посто, 96 посто се млади луѓе, луѓе во средни години, луѓе кои се мотивирани и храбри и коишто имаат визија, план, проект за општината која планираат во иднина како градоначалници да ја застапуваат пред граѓаните и јас сум убеден дека граѓаните тоа ќе го препознаат бидејќи сосема спротивно на тоа е она што го нуди СДСМ. Ние како опозиција комплетно ќе ја делегитимираме оваа неспособна Влада“,
рече Мицкоски.
ВМРО-ДПМНЕ, според него, ќе освои поголоем број градоначалници од СДСМ и повеќе гласови и на советнички листи.
Коалицијата со Села и Гаши, како што додаде, е коалиција против корупција.
„Таа не е коалиција брак, туку тоа е коалиција против корупција која треба да ја води владата во Македонија и таа влада има сериозни намери да ги расчисти криминалот и корупцијата која се случуваше изминативе четири години. Коалицијата против корупција ќе ве порази вас и сите останати бидејќи сте до гуша заглавени во криминал“,
рече Мицкоски.