Раст на економијата во државава од 4,1 процент, буџетски приходи во износ од 212,6 милијарди денари и расходи од 247,5 милијарди денари, буџетски дефицит од 4,9 проценти од БДП, како и капитални инвестиции во износ од 23 милијарди денари, се дел од она што е планирано со предлог-буџетот за 2021.
Предлог-буџетот синоќа помина на владина седница, а денеска го презентираа премиерот Зоран Заев и министерот за финансии Фатмир Бесими, според кои, станува збор за буџет кој се однесува на економска стабилност и забрзан раст со долгорочна фискална консолидација. Тој сега ќе биде поднесен и до Собранието кое ќе треба да расправа за него и да го изгласа.
„Главни приоритети на Буџетот за 2021 година е поддршка на здравствениот сектор, што значи заштита на здравјето и животите на луѓето, економско заздравување и раст, преку мерки за социјално ранливите категории, поддршка на економијата и зачувување на работните места. Нашиот фокус во текот на 2021 година, колку што е можно повеќе го насочуваме на политики кои ќе поддржат инвестиции за зголемување на конкурентноста и политики кои ќе поддржат реализација на капитални инвестиции што на среден рок ќе значи одржлив раст односно забрзување на стапката на раст“,
рече Заев.
Министерот за финансии Фатмир Бесими нагласи дека предложениот буџет е за ревитализација на економијата и враќање на патеката на економски раст кој треба да биде двојно поголем во однос на изминатата деценија или во просек пет проценти од БДП.
Поради здравствено-економската криза, Буџетот е планиран на нов, подолгорочен и посеопфатен начин, согласно концептот на „паметни“ финансии. Со овој Буџет, потенцираше Бесими, почнуваме нов концепт – фискалната година од 12 месеци се менува со петгодишна рамка.
„Очекувањата за 2021 година за нашата економија е дека таа ќе забележи раст од 4,1 процент во 2021 година, по што во 2022 година се очекува раст од 4,6 проценти, во 2023 од 5,2 проценти, во 2024 од 5,6 проценти и во 2025 од 5,9 проценти. Проекцијата за 2025-2030 година е просечен раст на економијата од 5,75 проценти“,
рече Бесими.
Со Буџетот се планирани: Стратегија за заздравување на економијата и забрзан раст или SmartER Growth, политики за буџетска консолидација и План на јавни инвестиции од 2021-2025.
Со цел да се поттикне ревитализацијата на економијата и да се поддржи нејзината стабилност, како што беше презентирано, преку Стратегијата за економски заздравување и забрзан раст предвидени се компонентите: економско заздравување од ковид-19, забрзан, инклузивен и одржлив раст, зајакнување на конкурентноста на приватниот сектор и развој на човечките ресурси и еднакви можности. Фискалната консолидација се планира да се постигне преку подобрување на наплатата на буџетските приходи, намалување и преструктурирање на буџетските расходи и промени во изворите на финансирање на буџетскиот дефицит.