Премиерот Зоран Заев и потпретседателот на ВМРО-ДПМНЕ, Александар Николоски, ќе се соочат на суд поради тужба која ја поднел лидерот на СДСМ поради изјава на опозиционерот.
Оваа информација денеска на прес-конференција ја соопшти Николоски кој, пак, му порача на Заев дека не му се плаши.
Тужбата е за изјава во која Николоски вели дека Заев е на врвот на пирамидата што изрекетирала над 20 милиони евра. Како отштета премиерот бара 60.000 денари.
Целта на власта и Заев, според Николоски, е сега тој јавно да се извини, да се уплаши и да се повлече.
„Бара да му исплатам 60.000 денари отштета, како и да му го платам скапиот адвокат. Бара 60.000 денари отштета затоа што брат му Вице е исто така во тужба за клевета, не успеа да добие од мене 30.000 денари отштета, па сега веројатно по принципот евро за евро бара 60.000 денари отштета за да можат со брат му да поделат по 30.000 денари. Зоран, кој јавно го советуваше Вице да не ме тужи за клевета, сега тој истиот Зоран ме тужи“, изјави денеска Николоски.
Потпретседателот на ВМРО-ДПМНЕ и сега вели дека тоа што изјави е вистинито и за тоа не мора да му потврди Заев, туку, како што рече, тоа го потврдува времето.
„Ниту планирам да се извинам, ниту планирам да се повлечам, ниту да ја свиткам кичмата затоа што тоа не е дел од мојот карактер. Особено не кога ја говорам вистината. Ќе одиме на суд. Зоран Заев, со најскапиот адвокат во државата, може да покани и некој друг да го застапува, јас сам. Тој со најскапиот адвокат во државата и против вистината, а јас ќе се бранам сам и со вистината и ќе победам затоа што ќе победи вистината“, порача Николоски.
Во изјавата, поради која премиерот поднел тужба, Николоски вели: „Некаде пред две недели споменав дека вкупната сума на побарани изрекетирани средства надминува 20 милиони евра. Досега никој ова не го демантираше, што значи дека е рекетиран повеќе од еден бизнисмен, рекетирани се многу бизнисмени и побарани се многу пари. Тоа е операција која не можат да ја завршат еден или двајца луѓе. Тоа е операција која е добро осмислена од врвот на СДСМ, координирана лично од Зоран Заев и понатака управувана од целата држава, затоа е потребна и кривична и политичка одговорност“.