Доаѓа време на ред, правда и дисциплина. Влегуваме во бескомпромисна борба против корупцијата и криминалот на сите нивоа. Тоа ќе биде најважната приказна. Законите се донесени, сега е време за нивно доследно спроведување, кој не сака да почитува закон, ќе се соочи со закон.
Ова е една од пораките кои ја упати премиерот Зоран Заев во неговото обраќање на одбележувањето на Денот на независноста – 8 септември.
Заев повика секој граѓанин да се приклучи во периодот во кој следува најинтензивната македонска европеизација. Секој од нас е важен и потребен, рече тој, по што упати порака и до опозицијата.
„Во граѓаните гледаме коректив, но и партнер. Следете ја нашата работа и испраќајте гласни, конструктивни и аргументирани забелешки. Ние како и досега ќе го слушаме вашиот глас, ќе ги следиме вашите потреби. Во таа насока ја повикувам и опозицијата да ги напушти тесноградите партиски интереси и да покаже државничко однесување. Патот кон независноста е поплочен со заложбите, напорите и саможртвата на огромен број генерации во македонската историја. Ја имаме неповторливата можност Северна Македонија да седне на своето столче на масата на европските држави. Тоа е шанса која нема да ја пропуштиме. Да го зграбиме моментот и самоуверено сите заедно да зачекориме по европскиот пат – слободни и отворени кон светот“,
рече премиерот.
Ситуацијата со ковид-19, очекувано се најде во неговиот говор.
„Ќе ја добиеме битката“, рече Заев нагласувајќи дека оваа пандемија уште посилно ја потврдила заложбата на владата во овој мандат да продолжи да вложува во здравствениот систем, а како една од најважните инвестиции го спомена проектот за изградба на нов Клинички центар.
Тој најави и четврт пакет на економски мерки, а потоа и заздравување на економијата.
„Оваа криза за нас е дополнителен мотив да работиме двојно повеќе. Владата ќе ја води државата кон излез од кризата со што помалку последици, како и кон брзо враќање на претходните стапки на раст на економијата. Создаваме рамка која ќе овозможи платите и пензиите да продолжат да растат, а граѓаните да имаат поголема куповна моќ. Да обезбедиме подобар животен стандард и да ја намалуваме невработеноста“,
рече Заев.
Премиерот зборуваше и за минатото и рече дека сите историски процеси и настани на нашата државност и независност се проследени со борба за слобода, правда, еднаквост и солидарност. Денес, на 29 години од нашата независност кога земјата е слободна и отворена кон светот и со решени проблеми, според него, имаме најмногу пријатели.
„Нашето место во ОН е недвосмислена потврда за македонскиот јазик и за македонскиот идентитет. Македонскиот јазик се користи слободно секаде во сите меѓународни институции, активности и настани. Благодарение на напорите кои во минатиот мандат ги насочивме на надворешен план со упорност и одважност ги постигнавме Договорот за добрососедство, пријателство и соработка со Бугарија и Договорот од Преспа со Грција, договори со кои Северна Македонија по децениско заостанување направи пробив на меѓународен план. Сето ова се реализираше првенствено низ полноправното членство на нашата држава во НАТО и почеток за преговори со ЕУ, како и низ градењето на партнерски однос со сите наши соседи“,
истакна Заев.
Тој својот говор го одржа на централната манифестација која се одржа пред Владата, а беше организирана според ковид-протоколите. Пред неговото обраќање, се одржа чинот на менување на знамињата пред платото на владината зграда и се интонираше македонската химна.