На неговата објава брзо реагираше Мицкоски, кој го обвини Заев дека одлучил да продолжи да го распродава македонското достоинство
Делчев е борец за социјална правда, а Мицкоски е бранител на криминал и неправда. Тие двајца никако не одат заедно, напиша премиерот Зоран Заев на својот Фејсбук-профил, откако лидерот на ВМРО-ДПМНЕ, Христијан Мицкоски најави нов протест под мото „За ЕУ, за Македонија, за Делчев“.
„Тоа на Мицкоски му го порачаа и граѓаните на Делчево каде ВМРО-ДПМНЕ изгуби со повеќе од 1000 гласови разлика на последните избори“,
напиша Заев на својот Фејсбук-профил.
На неговата објава брзо реагираше Мицкоски, кој го обвини Заев дека одлучил да продолжи да го распродава македонското достоинство.
„Гоце Делчев е идеолог и водач на македонската револуционерна организација и се бори за ослободување на Македонија. Македонија која вие ја засрамивте, пониживте, опљачкавте и разочаравте. Жалам што, наместо да промовирате вистински европски вредности, се одлучивте да продолжите да распродавате од нашето достоинство и не заборавивте да крадете. Ќе ви тежи цел живот предавството и криминалот што го правите. Македонија и Македонците не забораваат. Жалам за поразот во Делчево, ќе бидеме подобри следниот пат кога ќе има демократски избори, а се радувам на победата во повеќе од 40 општини, вклучувајќи го и Скопје“,
напиша Мицкоски.
Прашањето за договорот со Бугарија се актуализираше, откако бугарскиот министер за одбрана, Красимир Карачанов рече дека Бугарија ќе го блокира македонскиот пат кон ЕУ ако нема напредок по историските прашања.
Коментирајќи ја неговата изјава, Заев во гостувањето на МРТВ рече дека е оптимист и дека верува оти ќе се најде решение со кое двете страни ќе излезат победници.