Без да ја коментирам и да навлегувам во детали за оправданоста на одлуката на Стејт департментот за забрана за влез во САД на поранешниот вицепремиер Кочо Анѓушев, само ќе напоменам, како и порано кога сум бил премиер, така и сега, стојам на располагање за сите потребни одговори и разјаснувања на определени теми од интерес на нашите стратешки пријатели и партнери во врска со ќкоја било општествено-економска и политичка тема во земјава, вклучително и основот за сомневањата кон Анѓушев, вели Заев во писмен допис испратен до медиумите
Поранешниот премиер Зоран Заев, преку писмен допис испратен до медиумите, му изразува поддршка на поранешниот вицепремиер за економски прашања Кочо Анѓушев за, како што вели, докажување на неоснованоста за сомневањата кон него изразени од нашите пријатели Соединетите Американски Држави. Тој во дописот додава и дека стои на рапсолагање за сите потребни одговори и разјаснувања во врска со која било тема, вклучително и основот за сомневањата кон Анѓушев.
„САД се стратешки пријател и партнер на Северна Македонија. Сметам дека јас лично, а и како поранешен претседател на Владата, сум исто така пријател на САД. Тоа сум го потврдил низ конкретни примери во текот на моето работење. Тоа јавно го имаат и потврдено највисоки претставници на САД. Без да ја коментирам и да навлегувам во детали за оправданоста на одлуката на Стејт департментот за забрана за влез во САД на поранешниот вицепремиер Кочо Анѓушев, само ќе напоменам, како и порано кога сум бил премиер така и сега, стојам на располагање за сите потребни одговори и разјаснувања на определени теми од интерес на нашите стратешки пријатели и партнери во врска со било која општествено-економска и политичка тема во земјава, вклучително и основот за сомневањата кон Анѓушев“,
стои во дописот на Заев кој го објави „24инфо“.
Во дописот Заев нагласува дека Анѓушев и неговиот тим биле едни од најпосветените и најспособни луѓе со кои работел.
„Јавно сакам да го споделам мојот став кој веќе ѝ е познат на јавноста, а тоа е дека Кочо Анѓушев и неговиот тим беа едни од најпосветените и најспособни луѓе и кабинет во Владата во периодот додека бев јас премиер. Голем дел од економските успеси на Владата беа директна заслуга на Анѓушев. Северна Македонија ретко кога имала вака висок функционер кој е и професор, но пред сѐ и успешен деловен човек со огромно практично искуство во економската проблематика и предизвиците на државата во економијата. Како премиер, ми беше чест што имав таков соработник кому економијата и државата му беа секогаш на прво место. Знаеше да каже и покаже дека неговите фирми и капитал вредат онолку колку што ни вреди државата и дека само со успех на државата може да имаме сите надеж дека ќе успееме во сопствените приватните деловни планови“,
вели поранешниот премиер.
Сите шпекулации што ги слушам деновиве, дури и од одредена јавна институција, додава тој, ги сметам за неосновани затоа што Владата и стручните служби своевремено им имаат обезбедено и испратено навремен, соодветен и основан одговор.
„Анѓушев е мој пријател и соработник кој исклучително го почитувам. Јас го замолив мај 2017 година да прифати, да одработи одреден период за македонскиот народ и државата. Тоа го правеше чесно, одговорно и посветено. Денеска ја има мојата подршка во докажување на неоснованоста за сомневањата кон него изразени од нашите пријатели Соединетите Американски Држави“,
дециден е Заев во писмениот допис.
Бизнисменот и поранешен вицепремиер Кочо Анѓушев се најде на американската „црна листа“ поради неговата вмешаност во значителна корупција, објави пред една недела американскиот Стејт департмент.
Американската амбасадорка Анџела Агелер на денешниот брифинг со неколкумина новинари посочи дека ставањето на Анѓушев на „црната листа“ не се должи на сомневања, туку на многубројни докази за негова вмешаност во коруптивни активности. Таа не откри детали за кои случаи конкретно станува збор. Сепак, рече дека не станува збор за изолиран случај.
Со конкретните санкции на Анѓушев и неговото семејство им е забрането да патуваат во САД, но не и на неговите бизниси да продолжат да функционираат во Америка. Агелер вели дека засега таа не знае дали има и можност Анѓушев да биде опфатен со санкции од некоја друга американска институција, како на пример, од Министерството за финансии. Но, не пропушти да потсети дека имало случаи кога едно лице било санкционирано од две различни американски институции.
Анѓушев, пак, ги негираше сите сомневања на Стејт департментот и најави жалба на одлуката.