Според вицепремиерот, контроли се направени кај сите фирми кои увезуваат мазут и најави дека секаде каде што има прекршок ќе има одговорност
На денешната прес-конференција, Николовски оцени дека општините, министерствата и Владата стануваат транспарентни институции. Рече дека за 18 проценти е зголемена нивната активна транспарентност, споредено со 2016 година
Во текот на утрешниот ден ќе се анализираат сите информации во врска со истрагата за увозот на течни горива, а наредниот ден ќе излеземе со информација за јавноста, соопшти денеска на прес-конференција во Владата, вицепремиерот за борба против корупција Љупчо Николовски.
„Се прави детална анализа за активностите, за да се има целосен увид и достапни информации. На владина седница се донесоа насоки кои беа дадени на институции, а пред некој ден имаше вонредна владина седница на која се побараа дополнителни информации. Утре ќе има координативен состанок со министерот за економија и државните институции, а во вторник ќе се излезе со повеќе информации“,
истакна Николовски, одговарајќи на новинарско прашање.
Според вицепремиерот, контроли се направени кај сите фирми кои увезуваат мазут и најави дека секаде каде што има прекршок ќе има одговорност.
Николовски информираше дека Владата веднаш интервенирала по информациите за постоење сомневања дека во одреден период во земјата биле увезувани токсични нафтени деривати, опасни по здравјето и животната средина, кои при увоз влегувале како мазут и се користеле како гориво за греење во повеќе државни институции, но и како гориво во приватни компании во земјава.
На денешната прес-конференција, Николовски оцени дека општините, министерствата и Владата стануваат транспарентни институции. Рече дека за 18 проценти е зголемена нивната активна транспарентност, споредено со 2016 година, односно нивната транспарентност изнесува 63 отсто, за разлика од 2016, кога била 45 проценти.
„Дури 62 од вкупно опфатените 98 институции ја подобриле својата активна транспарентност во 2021 година во однос на 2016 година. Ако во 2016 година само 24 институции биле во категоријата ‘многу добра’ и ‘добра’ транспарентност, оваа година дури 62 институции се во овие две категории. Особено се забележува подобрување на транспарентноста кај министерствата. Во 2016 година само едно министерство било во категориите ‘многу добра’ и ‘добра’ транспарентност. Оваа година дури 12 министерства ја подобриле транспарентноста и се искачиле токму во овие две категории,
информираше Николовски, презентирајќи ги најновите податоци на извештајот за Индекс на активна транспарентност на Центарот за граѓански комуникации.