Српскиот претседател реагира на изјавата од Кабинетот на Пендаровски за решавање на спорот Белград – Приштина дадена за косовскиот весник „Газета експрес“
Претседателот на Србија Александар Вучиќ ја нарече изјавата на претседателот Стево Пендаровски „обид за додворување на Германците“ и вели дека ги разбира тие што постапуваат така, но дека Србија никогаш нема да го признае Косово, што според него е крајната цел на ваквиот став.
Коментарот на Вучиќ е за изјавата од Кабинетот на претседателот на Северна Македонија, Стево Пендаровски, за косовскиот весник „Газета експерс“, во која вели дека е против идејата за корекција на границата меѓу Белград и Приштина.
Српскиот претседател, како што пренесе mondo.rs, истакна дека изјавата на Пендаровски е само повторување на ставот на германскиот министер за надворешни работи Хајко Мас.
„Тоа го кажа Хајко Мас, министерот за надворешни работи на Германија, има интересни текстови и за други прашања кои денес не би ги коментирал. Србија не е во лесно и едноставно опкружување, се трудиме со сите, дури и со оние кои го признаа Косово и не им беше грижа за зачувување на меѓународното јавно право. Единствено, Пендаровски на инаугурацијата го замолив само, го молев како Бога, веќе направивте нешто што многу земји различно би го протолкувале, гледајте за тие теми да не зборувате, тоа не е ваша работа, а кога ќе го правите тоа, размислете дека постојат некои кои мислат поинаку“,
изјави Вучиќ, истакувајќи дека, сепак, било направено спротивно од она што мислел дека е постигнато со тој договор.
„Тие, се разбира, направија се’ спротивно на мојата молба и како сметав од тој договор, за да се истакнат во своето додворување кон Германците по којзнае кој пат. Германија денес е доминантна сила и ако постои некој кој од целата оваа приказна излегува како неверојатно доминантен, тоа е Германија. Го разбирам изборот на многумина во регионот дека некогаш на неумерен начин им се додворуваат на најмоќните. Јас ги почитувам Германците, но нема да се додворувам ниту на сопствениот народ ниту на претставниците на другите народи“,
изјави Вучиќ.
Тој смета дека ваквите изјави на, како што ги набројува Лајчак, Мас и Пендаровски кои ги нарекува „гении“ – да нема територијални промени, во превод за народот во Србија значат дека целта е Србија да го призае Косово како независна држава, што според Вучиќ нема да се случи.
Како што пренесе РТС, Пендаровски во изјавата за приштинскиот весник „Газета експрес“ вели дека ги поддржува напорите на САД и на ЕУ да се дојде до напредок во дијалогот меѓу Белград и Приштина и дека се залага за компромисна спогодба која би имала силна меѓународна гаранција и би придонела за стабилноста.
„Претседателот Пендаровски верува дека решенија кои можат да доведат до промена на границите и размена на територии и луѓе може да имаат штетно влијание врз регионот и врз сеоопфатните напори кои се вложуваат во постконфликтното опоравување на регионот и изградбата на одржливи мултиетнички општества“,
се вели во изјавата на претставичката на Кабинетот на Пендаровски, Билјана Радева за „Газета“.
Понатаму, според РТС, во неа се додава дека Пендаровски разбира дека може да постојат различни погледи за решение и ги повикува страните вклучени во тој процес меѓусебно да изградат доверба и да ги намалат тензиите за да има напредок кон компромис.
Од Кабинетот на Пендаровски не сакаат да ја коментираат изјавата на српскиот претседател Вучиќ.
Претходно, српскиот министер за одбрана Александар Вулин, во реакција на оваа изјава на Пендаровски, упати навредливи зборови кон македонскиот јазик, порачувајќи му на Пендаровски да молчи на јазикот кој никој не го признава освен Србија и дека неговото мислење никој не го побарал.
Од Кабинетот на Пендаровски одговорија дека тој став не заслужува коментар.