Филипче денеска рече дека очекува во фокусот на средбата да бидат разговорите околу образованието, здравството, правосудството, заштитата на животната средина и партизацијата во институциите
За утре во 14 часот е закажана средбата меѓу претседателот на Социјалдемократскиот сојуз на Македонија (СДСМ), Венко Филипче, и премиерот Христијан Мицкоски, информираа попладнево за „360 степени“ од СДСМ.
Средбата, додаваат оттаму, ќе се одржи во зградата на Владата.
Потврда за средбата стигна и од Владата, од каде што велат дека таа е закажана согласно јавната комуникација и упатените иницијативи и демонстрираната подготвеност од двете страни.
Денеска лидерот на СДСМ, Венко Филипче, истакнувајќи ги темите за кои смета дека треба да се разговара на лидерска средба на претседателите на политичките партии, рече дека најпрво треба да оствари тет-а-тет средба со премиерот Христијан Мицкоски бидејќи, како што рече, тој прв подал рака и одговорил дека средбата е прифатлива.
Филипче рече дека на тет-а-тет средбата со премиерот најпрво треба да се разгледаат темите, дури потоа и за начинот односно методологијата како, доколу се договорат на овие теми, би работеле и би се спровеле во пракса.
Тој очекува во фокусот на средбата да бидат разговорите околу образованието, здравството, правосудството, заштитата на животната средина и партизацијата во институциите. Тој додава дека трагедијата во Кочани ги освестила системските слабости и дека е крајно време сите политички чинители да почнат да работат заедно за доброто на државата.
Премиерот Христијан Мицкоски изјави дека е подготвен да го прими на средба лидерот на СДСМ, Венко Филипче, во кое било време доколку навистина има план за подобрување на состојбите во државата и сака да помогне.
Мицкоски смета дека е непристојно за ова да разговараат преку медиумите зашто, како што рече, ова е сериозна тема, а за сериозна тема се седнува и се разговара очи во очи.
Инаку, Филипче кон крајот на минатиот месец рече дека ќе упати повик за лидерска средба во Собранието на лидерите на најголемите политички партии на кои, како што рече, ќе им го презентира својот план, она што тој смета дека партиите имаат обврска да го направат за државата, настрана од сите коалиции.
Тој рече дека од трагедијата во Кочани треба да се извлече поука за во иднина да се спречат вакви трагедии.
На повикот на претседателот на опозициската СДСМ, Венко Филипче, за одржување средба на лидерите на најголемите партии во Собранието, се произнесоа од владејачката коалиција „Вреди“, Движењето ЗНАМ, кое исто така е дел од владината коалиција, опозициската Левица, а реакција во врска со повикот имаше и ДУИ.