Шефот на дипломатијата вели дека во неговиот мандат досега се испратени 21 амбасадор, од кои 15 се од МНР. Тоа, според него, е „квантен скок“ во споредба со периодот по 2006 година (кога министер беше Милошоски н.з.), а кога за дипломати биле испраќани кадри кои дотогаш работеле во дом за стари лица, во детска градинка или во фабрика за чоколада…
Нов предлог за амбасадор на Северна Македонија во Вашингтон во скоро време најави денеска шефот на дипломатијата, Бујар Османи, посочувајќи дека очекува многу брзо да се пополнат преостанатите седум дипломатски позиции во македонските дипломатско-конзуларни претставништва.
Во однос на пополнувањето на амбасадорското место во Софија, Османи рече дека предлогот поминал на Влада и дека веќе е испратено барање за агремани до Бугарија.
„Со оглед на тоа што за седум дена успеавме да се усогласиме за амбасадор во Софија, покажавме дека имаме капацитет и за останатите седум места, така што се надевам на брзи решенија“,
рече Османи одговарајќи на новинарски прашања на денешната прес-конференција.
Тој рече дека едно од неговите најзначајни постигнувања откако е на чело на МНР (од 2020 год. н.з.), е испраќањето на дипломатски претставници, од кои дел биле предложени и за време на неговиот претходник (Никола Димитров н.з.).
„Откако сум јас министер, испратени се 21 амбасадор, што е повеќе од една третина, со оглед на тоа што имаме 60 дипломатско-конзуларни претставништва, од кои околу 40 се амбасади, а другите се во мисии и генерални конзулати. Во 15 ДКП се испратени дипломати од кариера, како во Виена, Москва, Њу Делхи, Камбера, Токио, Прага, Хаг, Атина, Доха, Копенхаген, Талин, Приштина, Тирана..“,
рече Османи потенцирајќи дека им се дало предност на дипломати од МНР, иако законската обврска е најмалку една четвртина од амбасадорите да бидат од Министерството.
Османи рече дека и амбасадорите надвор од МНР што заминале во овој период во мисиите се, главно, реномирани личности и доктори на науки. Притоа, посочи дека постои вечна битка меѓу МНР и Владата околу профилот на амбасадорите што се предлагаат, сепак, посочувајќи дека сега тенденцијата е тоа да бидат во поголем дел дипломати од кариера.
Според шефот на дипломатијата, тоа не било случај во периодот по 2006 година (кога министер беше Антонијо Милошоски н.з), кој е опфатен со анализата за пополнување на амбасадорските места. Тогаш, како што рече, на дипломатски позиции биле испраќани и луѓе без никакво претходно дипломатско искуство, кои дотогаш работеле во дом за стари лица, во градинка, во фабрика за чоколада, како и лица со факултет по физичка култура или со шумарски факултет…, за што наброи конкретни примери.
„Во периодот кога јас сум министер се испратени многу повеќе професионални дипломати, а и оние кои не се од МНР се афирмирани и потврдени личности, што е квантен скок во споредба со периодот од 2006 година“,
нагласи Османи.
Најавата за испраќање на 28-годишна ТВ-презентерка за генерален конзул во Њу Џерси тој ја нарече „хипотетичка одлука“, посочувајќи дека не може да коментира за затворена владина седница затоа што станува збор за доверливи прашања.
„Не можам да кажам дали имало точка на дневен ред или само расправа. Тоа што можам да го кажам е дека таква одлука не е објавена во ‘Службен весник’, ниту, пак имаме намера да го менуваме нашиот генерален конзул таму, кој има мандат до 2023 година“,
рече Османи.
За именувањето на Петрит Муслиу за генерален конзул во Чикаго рече дека станува збор за предлог од 2019 година што тој го потврдил и посочи дека тој е дипломиран правник со магистратура по меѓународно право.