Во Министерството за надворешни работи е формирана работна група, која ќе ги проверува сите именувања и упатувања на амбасадори и генерални конзули од 2006 година до денес и ќе подготви компаративна анализа.
Од ресорното министерство велат дека анализата се подготвува со цел да се проверат сите детали – под кои околности се упатувани и каков е квалитетот на кандидатите кои како први лица во ДКП-ата ја претставуваат земјата во странство. Анализата ќе биде и јавно презентирана.
„Чешлањето“ на именуваните амбасадори и конзули доаѓа во екот на скандалот со наводното испраќање 28-годишна ТВ-презентерка за генерален конзул во Тотова, САД – информација што МНР ја демантира.
Од МНР велат дека во изминатава година на мандат се упатени 20 предводници на странските преставништва, од кои 16 се професионални дипломати од Министерството, што претставува 80 отсто од упатените.
„Професионализацијата на дипломатијата останува еден од врвните приоритети на Министерството за надворешни работи и во периодот што претстои, за што се покренати повеќе иницијативи за кои јавноста е веќе запознаена, меѓу кои и нов предлог закон за МНР со кој процентот на обврска за упатување дипломати од кариера ќе се зголеми од сегашните најмалку 33 на 75 проценти“,
соопштија од МНР.
Пратеникот Антонио Милошоски од ВМРО-ДПМНЕ, кој е претседател на собраниската Комисија за надворешна политика, вчера побара ресорниот министер Бујар Османи на комисиска седница да реферира за актуелните случувања во дипломатијата.
„Дипломатијата, за жал, често именува дипломати врз основа на личен клиентелизам, наместо врз основа на стручност. Последните примери со генералните конзули во Чикаго и Њујорк се доказ дека одредени кадровски решенија се носеле зад завесата ‘затворена владина седница’, иако не ги исполнувале предвидените законски услови. Затоа Османи треба да даде отчет пред пратениците како претставници на граѓаните“,
рече Милошоски.
Но, додека од една страна Милошоски го кани Османи на комисиска седница, од друга страна, не ги става на дневен ред кандидатите за амбасадори, кои ги исполниле сите законски услови, и треба да ги презентираат тезите пред заминувањето во мисиите.
Таков е случајот со професорот Љубомир Фрчкоски, кој е утврден кандидат за амбасадор на Северна Македонија во Организацијата на обединетите нации (ООН), за кој МНР со две замолници бара Собранието да го деблокира назначувањето.